Për kampionin e botës në fuqi nuk kishte si të ndodhte ndryshe në Ostin të Teksasit, aty ku u zhvillua gara e tretë sezonale në Moto GP.
Spanjolli kishte vuajtur në nisje të këtij sezoni, për t’u kthyer me një fitore në një pistë shumë të pëlqyer për të. Një rekord më vete, kjo do të ishte fitorja e tij e 11-të radhazi në tokën amerikane.
Marc Marquez do të luftonte fillimisht me shokun e tij të skuadrës, Dani Pedrosa, teksa të dy pilotët e Repsol Honda-s patën një nisje të mrekullueshme.
Kryesuesi i kampionatit, Maverick Vinales, do të dilte shpejt nga gara, i rrëzuar në xhiron e dytë. Për Yamaha-n mbeti në garë Valentino Rossi, që ofroi si gjithmonë momente të bukura me parakalimet e tij.
Marquez e kaloi i pari finishin, i ndjekur nga Rossi dhe Pedrosa. I dyti, italiani veteran mori kryesimin e kampionatit, me 56 pikë.
Vinales e Marquez mbajnë vendin e dytë dhe të tretë në klasifikimin e përgjithshëm, me 50 dhe 38 pikë. Gara e ardhshme, e katërta sezonale, është në Spanjë, më 7 maj. /tesheshi.com/
