Mbresëlënëse ka qenë paraqitja e së hënës e Lestër Sitit, me një lojë që i përngjante asaj që e nxori kampion sezonin e shkuar.
Një paraqitje që është provë e pakundërshtueshme se të njëjtët lojtarë nuk donin më të luanin nën urdhrat e Claudio Ranieri-t. Çfarëdo që të thonë ata për të shmangur përgjegjësinë për shkarkimin e teknikut italian, fitorja ndaj Liverpulit fshin çdo alibi.
Përfundimi 3-1 e ngjiti Lestërin në vend të 15 në Premier League, duke dalë kështu nga zona e rënies në Championship.
Vardy qe lojtari më i mirë i ndeshjes; ai i shënoi dy prej golave. Rrjeta e tundur prej tij në minutën e 28-të i dha fund një periudhe të gjatë shterpësie të sulmit: Lestëri nuk shënonte në kampionat që prej fundit të vitit të shkuar, ashtu siç nuk e njihte fitoren në 2017-n.
Sa për Liverpulin, paraqitja qe një katastrofë e vërtetë. Për titull as që bëhet fjalë tani, por në rrezik është dhe pjesëmarrja në Champions League. Vendi i pestë në renditje, 14 pikë larg Çelsit kryesues; janë të dhëna zhgënjyese për një ekip që në nisje të sezonit pretendonte shumë më tepër se kaq. /tesheshi.com/
