Pas SHBA, edhe Gjermania ka zgjedhur të reagojë ndaj zhvillimeve të nxehta brenda sfondit të krizës politike shqiptare. Në prag të protestës së 9-të opozitës, qyshse dogji mandatet si pjesë e strategjisë për të diktuar dorëzimin e Ramës, Berlini zyrtar, me anë të ambasadës në Tiranë bën apel për mosushtrim dhune, e në të kundërt kujton përgjegjësinë që do të mbahet.
“Liria e tubimeve dhe e drejta për të demonstruar paqësisht janë kolonat e çdo demokracie. Ndërsa dhuna e çdo lloj forme është e papranueshme! Duke patur parasysh demonstratën e njoftuar për mbrëmjen e sotme u bëj thirrje të gjithë pjesëmarrësve të respektojnë ligjet në fuqi. Prej organizatorëve pres të angazhohen me të gjitha mundësitë për një zhvillim paqësor të protestës si dhe të jenë në lartësinë e përgjegjësisë së tyre përmes apelit publik për protesta paqësore”, thuhet në një deklaratë të fundit.
Ndërsa sa i përket aksionit të opozitës jashtëparlamentare PD-LSI me sulme ndaj KZAZ-ve në emër të ç’dekretit të Metës, edhe në këtë rast Berlini pozicionohet kundër.
“Me shqetësim të madh jam duke ndjekur ditët e fundit edhe trazirat e dhunshme në vende të ndryshme të Shqipërisë. Një gjë është e qartë: mësymjet e dhunshme nuk janë mjete legjitime të përballjes politike. U bëj thirrje me forcë të gjitha palëve të heqin dorë edhe nga sulmet verbale e të marrin përsipër përgjegjësitë e tyre për vendin”, thuhet në deklaratën e ambasadores Schütz. /tesheshi.com/
