Kryeministri Rama, referuar asaj çfarë po ndodh me Zgjedhoren dhe aksionin ndërkombëtar të paprecedent për ta miratuar, e cilësoi politikën shqiptare si në stad adoleshence.
“BE përherë të parë ndërhyn në politikën e brendshme për një sistem apo Kod zgjedhor. Kjo falë të gjithë baltës dhe sherrit nga pala që nuk është këtu sot duke përdorur lidhjet e saj. Në draftin e Bundestagut gjerman dhe pastaj të përfshirë nga KE, në variantin e parë ishte konsensus dhe është hequr pikërisht për të mos lejuar asnjë palë që të marrë peng zgjidhjen dhe është vendosur një kornizë të qartë, ku palët nuk mund të dalin nëse nuk duan të dalin për vullnetin e tyre, asnjëra nuk mund të detyrojë tjetrën për të mos dalë nga rekomandimet e OSBE-së. Në draftin e Bundestagut thuhej ‘një reformë mbi bazën e rekomandimeve të OSBE-së, miratuar në parlament’. Kjo bazë votohej në parlament kur dikush tenton ta bllokojë jashtë parlamentit. Ne preferuam që të durojmë.
Edhe pse puna e bërë me ekspertët ishte ezauruese në raport me rekomandimet, ne nuk erdhëm në fund të vitit të shkuar në parlament për ta votuar, pasi e konsideruam më të rëndësishme që të prisnim për konsensusin, një shpresë që nuk e kam pasur asnjëherë, dhe unë e di pse, sikur e dimë shumica e shqiptarëve. Megjithatë preferuam që të presim. Pastaj u vendos afati 31 maji, por nuk solli rezultat. Më vjen shumë keq që në vitin 2020, politika shqiptarë ka nevojë akoma për ambasadorë që të hyjnë në mes, që të bëjnë përkthyesin shqip-shqip për të lehtësuar procesin e komunikimit.
Kjo është një gjë që tregon stadin adoleshent të politikës shqiptare dhe të liderëve që nuk kanë kurajonpër gjëra që janë në interes të përbashkët për vendin”, theksoi Rama në parlament.
Ai shprehu pezmin që reforma nuk mundi dot të depolitizojë komisionet zgjedhore.
“Arsyeja kryesore e sherreve janë komisionet, kush identifikon dhe kush numëron. OSBE kërkon depolitizim të komisioneve. Si nuk e bëka populli shqiptar, që të vendosë në komisione njerëz që nuk vijnë si të partive, por në shërbim të këtij procesi. Edhe sot që flasim duket mision i pamundur për fat të keq”, theksoi shefi i qeverisë. /tesheshi.com/
