Italianët kanë bërë atë që i frikësoheshin të gjithë: kanë votuar për të qeverisur dy nga forcat populiste që kanë një qëndrim të qartë euroskeptik dhe janë ksenofobe me të huajt.
Nga rezultatet e dalë deri tani, Lëvizja 5 Yjet ka dalë parti e parë duke marrë rreth 32%, ndërkohë që ka pësuar katastrofë Partia Demokratike e Matteo Renzit që është në kuotën e poshtë 20%.
Deri tani asnjëra nga partitë nuk ka mazhorancën as në Dhomën e Përfaqësuesve e as në Senat, por me kalimin e orëve ka gjasa për një koalicion ndërmjet 5 Yjeve dhe Lega-s së Salvinit, e cila ka dalë shumë më mirë se Berlusconi në koalicionin e qendrës së djathtë.
Ka një rezultat shumë të qartë që ka dalë nga zgjedhjet italiane: në veri kanë votuar në shumicë për Lega-n, ndërsa në jug për Lëvizjen 5 Yje.
Kjo e fundit nga Roma e poshtë i ka fituar gati të gjithë deputetët, duke mundur Berlusconin pasi Renzi ka qenë në vend të tretë në të gjitha betejat.
Kjo ka sjellë një shqetësim në qarqet e Brukselit pasi i frikësohen një tronditje të Bashkimit Europian.
Megjithatë gjithçka do të varet nga skenarët qeverisës që do të zgjedhë presidenti Sergio Matarella, pas konstituimit të dy dhomave të parlamentit.
Lëvizja 5 yje nuk mund të bëjë koalicion më PD-në apo me Berlusconin, i cili ka dalë në zgjedhje si kandidat i përbashkët me Lega-n.
Ende nuk dihen numrat e kësaj të fundit në parlament.
Por në mëngjes mund të thuhet qartë se edhe pse zgjedhjet i ka fituar 5 Yjet dhe i ka humbur PD-ja e Renzit, Italia nuk ka zgjedhur një qeveri, Dhe ky do të jetë problem më i madh i saj. /tesheshi.com/
