Hillary Clinton fiton debatin e parë të kandidatëve të Partisë Demokratike Amerikane për President.
Në debat, i cili nuk ka qenë aq sensacional sa ai i republikanëve si pasojë e prezencës së Donald Trump, pati një fair play ndërmjet 5 kandidatëve në garë.
Edhe Senatori Bernie Sanders, që e konsideron veten socialist dhe ka tërhequr entuziazëm tek të rinjtë mbrojti zonjën Clinton për të ashtuquajturin “skandal të emaileve” që e cilësoi si montim i republikanëve, ndërkohë që ishte dakord me Presidentin Obama për të mos ndërhyrë në Siri. Sanders tha se aventura e Putinit do të dënojë presidentin rus i cili ende nuk e ka marrë vesh se në ç’telash është futur.
Debati i kandidatëve demokratë u mbajt në Las Vegas dhe u transmetua drejtpërdrejt në “CNN”.
Hillary Clinton ka sulmuar rivalin e saj kryesor, Bernie Sanders, mbi ligjet e armëve, ndërsa ai është kundërpërgjigjur duke thënë se mbështetja e zonjës Clinton për ndalimin e fluturimeve mbi Siri do të krijonte “probleme serioze”.
Përveç zotit Sanders dhe Clinton, tre kandidatët e tjerë janë: ish-guvernatori i Marilenitd Martin O’Malley, ish-senatori i Virxhinias, Jim VVebb dhe ish-senatori i Rhode Island, Lincoln Chafee.
Duartrokitjet më të mëdha nga të pranishmit i mori deklarata e Sanders, i cili tha se vendi ishte “sëmurur” nga dëgjimi i polemikave në lidhje me email-et e zonjës Clinton. Kjo ishte ndihma më e madhe për Clinton që i erdhi nga rivali i saj kryesor. Senatori, jo vetëm që refuzoi ta sulmonte për punën e shkëmbimeve me email-e kur ishte Sekretare e Shtetit, por tha që ishte lodhur dhe nuk duronte dot më që bëhej debat për këtë punë, në një kohë kur klasa e mesme amerikane po zhdukej, kur të varfrit po bëhen më të varfër e në kurriz të të gjithëve pasurohen 1% e njerëzve.
Kandidatët demokratë u pajtuan se energjia bërthamore dhe trazirat në Lindjen e Mesme janë kërcënimet më të mëdha për sigurinë e Shteteve të Bashkuara.
Clinton u shpreh se një pikë e fortë në fushatën e saj do të jetë ulja e taksave për amerikanët, ndërsa Sanders reagoi duke thënë se prioriteti i tij është të investuarit në punë dhe arsim e jo në burgje.
Megithatë në fund mungoi një sulm i ashpër nga rivalët e Clinton që do të mund ta rrezikonte atë. Kështu që ish-Sekretarja amerikane e Shtetit mund të quhet fituese e këtij debati të parë. /tesheshi.com/
