Në disa vendvotime në Kosovë, qytetarët serbë kanë filluar që të votojnë për kandidatin e preferuar për president të Serbisë. Sipas policisë së Kosovës, deri tani në këtë proces, nuk ka pasur ndonjë incident specifik.
“Është një ditë e qetë. Nuk ka asnjë incident, as ndonjë problem të shkaktuar deri më tash. Është shumë qetë”, ka thënë për mediat ksoovare, zv.drejtori i policisë për rajonin e Mitrovicës, Besim Hoti.
Ndërkohë, agjencia e lajmeve “Kosova Press”, raporton se pjesëtarë të xhandarmerisë serbe me rroba civile janë parë në shkollën e mesme teknike “Mihajllo Petroviq-Allas”, në veri të Mitrovicës.
Këtë qendër e ka vizituar edhe ambasadori Jan Braathu, kryesues i Misionit të OSBE-së në Kosovë, si dhe shefi i zyrës ndërlidhëse të Serbisë në Kosovë, Dejan Paviçeviç.
Nga gjithsej 90 vendvotime që do të jenë në Kosovë, 30 prej tyre janë në komunat veriore të vendit, përkatësisht në veri të Mitrovicës 11, Zveçan 7, Zubin Potok 7 dhe në Leposaviq 5 vendvotime.
Mësohet se edhe në Zveçan, Leposaviq dhe Zubin Potok janë hapur qendrat e votimit me kohë. Numri i atyre që kanë të drejtë vote në veri të Mitrovicës është rreth 15.137 persona. /tesheshi.com/
