Edhe në zgjedhjet serbe, fenomeni i votës së blerë me para në dorë ka qenë prezent. Kjo, pikërisht në veriun e Kosovës, ku për 30 euro iu është blerë vota asaj shtrese të margjinalizuar, e që është komuniteti rom, ashkalij dhe egjiptas, i njohur ndryshe nën ankronimin RAE.
Në një numër të konsiderueshëm, ata votuan në qendrën e shkollës teknike “Mihajllo Petroviq-Allas”, në veri të Mitrovicës.
Një burim i afërt me portalin tesheshi.com, tha se pjesëtarë të komunitetit RAE u transportuan për në qendrën e votimit në veri të Mitrovicës në mënyrë të organizuar dhe atë nën monitorimin e ish-pjesëtarit të “Mbrojtjes Civile Serbe”, Nemanja Miletiq, i njohur me nofkën “Guzo”.
Sipas burimit, pjesëtarët e komunitetit RAE janë shpërblyer me nga 30 euro për person për të votuar për pushtetin aktual, përkatësisht SNS-në e Aleksandar Vuçiqit.
Burimi tha se atyre iu është bërë presion që nëse nuk votojnë, atëherë qeveria e Serbisë do t’jua ndalojë çdolloj përkrahjeje sociale.
“Më duhet me shku me votu, se përndryshe na kanë thënë se do të na ndalin dhënien e ndihmave sociale si dhe shtesat për fëmijët”, i ka thënë portalit tesheshi.com një pjesëtar i komuniteti RAE nga lagja e romëve në jug të Mitrovicës me kusht të anonimitetit.
Por nuk është fjala thjesht për të votuar; çështja është se për kë duhet të votojnë.
“’Duhet me votu për Vuçiqin’, po na thonë këta që po na bartin me furgon. I kishin listat me emrat tanë. Në çdo listë ishin nga 30 emra”, ka thënë qytetari nga komuniteti RAE.
“Fiton Vuçiqi, ashtu si gjithmonë në Kosovë ka fituar Sllobodan Millosheviqi. Pra vota e serbëve në Kosovë do t’i vjedhë partina në pushtet”, ka thënë më tej Millan Vukadinoviq, banor i veriut të Mitrovicës.
Ai ka shtuar se qytetarë serbë të Mitrovicës, me shumë frikë kanë ardhur në qendrat e votimit për të votuar lirshëm, pasiqë grupe mafioze dhe kriminale iu bër presion në popull që të votojnë SNS-së e Aleksandar Vuçiqit.
“Ja, shikoni matanë fugonit të bardhë ata djem. Janë nga “Mbrojtja Civile Serbe” dhe po bëjnë presion tek qytetarët që votojnë Vuçiqin, por edhe në korridoret e shkollës, dhe brenda në qendrat e votimit janë këta njerëz”, ka thënë Vukadinoviq.
Sipas tij, edhe serbët që punojnë në institucione dhe organizata të ndryshme në veri të Mitrovicës u sollën në mënyrë të organizuar për të votuar, nën presionin senëse nuk vijnë për të votuar, do të kenë pasoja deri në largim nga puna.
Por kjo që ndodh në terren, nuk reflektohet në perceptimin e organeve shtetërore, gjegjësisht Policisë së Kosovës, e cila ka qenë më pranë situatës përgjatë procesit të votimit. Për të, situata ka kaluar qetësisht.
“Policia e Kosovës është duke e dhënë asistencën e saj për OSBE-në në grumbullimin e votave të zgjedhjeve të Serbisë në Kosovë”, ka thënë Besim Hoti, z/drejtor i policisë për rajonin veri. Sipas tij, Policia e Kosovës është duke iu përgjigjur kësaj situate në kuadër të detyrave të rëndomta, pikërisht në ruajtjen e rendit dhe qetësisë publike.
Për zgjedhjet parlamentare serbe, në veri të Kosovës u hapan gjithsej 6 qendra të votimi, një në veri të Mitrovicës, një në Zubin Potok, një në Zveçan dhe tre qendra të votimit në Leposaviq. E. H – /tesheshi.com/
