Liderja triumfatore e së djathtës ekstreme, Fronti Nacional, Marine Le Pen thotë se votuesit francezë refuzuan “klasën e vjetër politike” në zgjedhjet rajonale që nxorën në krye partinë e saj.
Gati një e treta e votuesve mbështetën partinë që luan fort me kartën e antiemigracionit, duke e nxjerrë fituese në gjashtë nga 13 rajonet që mbajtën zgjedhje.
Pavarësisht një rritjeje të votës për Frontin Nacional, raundi i dytë që mbahet më 13 Dhjetor mund të përmbysë shumë gjëra, e do të jetë vendimtar për rezultatin.
Këto zgjedhje, gjithsesi, ishin testi i parë elektoral që nga sulmet e muajit të kaluar në Paris, në të cilat humbën jetën 130 persona.
Fronti Nacional mori 28 për qind duke kaluar përpara partisë Republikane që drejtohet nga ish-presidenti Nicolas Sarkozy që mori më pak se 27 për qind, dhe duke tejkaluar socialistët qeverisës që vijnë si humbës të mëdhenj me 23.5 për qind.
Socialistët pritet të tërhiqen nga dy rajone në raundin e dytë në veri dhe në jug, në një përpjekje për të bllokuar fitoren e Frontit Nacional.
Ndërkaq, në një postim në Twitter, Marine Le Pen thotë se socialistët dhe republikanët po thërrmohen dhe se “populli francez është i lodhur e i dërrmuar nga ajo botë e vjetëruar politike”.
Le Pen e dënoi me forcë tërheqjen e disa kandidatëve nga raundi i dytë duke thënë se socialistët nuk po tregohen as besnikë e as demokratikë, duke i trajtuar votuesit si plaçkë për zgjedhje.
Sarkozy nga ana e tij ka refuzuar të bëjë marrëveshje taktike me socialistët për raundin e dytë.
Rezultatet janë një goditje e rëndë për presidentin socialist, Francois Hollande, i cili sikur po e përmirësonte mbështetjen pas sulmeve të Parisit.
Vetë Marinë Le Pen e ka distancuar veten nga i ati, Jea-Marie Le Pen që e themeloi partinë dhe është dënuar edhe për nxitje të antisemitizmit. Ajo ka hedhur si tezë se Franca nuk mund të pranojë më emigrantë muslimanë.
Shqetësimi në rritje për emigracionin dhe frika nga sulme të tjera terroriste besohet se qëndrojnë në themel të suksesit elektoral të Frontit Nacional.
Marine Le Pen fitoi fuqishëm në Nord-Pas-de-Calais-Picardie, një rajon verior i Francës, tepër i rënë nga ana ekonomike që dikur ka qenë bastion i socialistëve.
Mbesa e saj, Marion Marechal-Le Pen fitoi në Provence-Alpes-Cote d’Azur në jug. Të dyja morëm më shumë se 40 për qind të votave, duke thyer rekordet e mëparshme të partisë.
Marine Le Pen e cilësoi rezultat të mrekullueshëm që provoi, sipas saj, se Fronti Nacional “është pa dyshim partia e parë në Francë”.
“Fronti Nacional po shkul rrënjë, ndërsa po strukturohet dhe në vijimësi po fiton besimin e popullit francez”, tha ajo.
Më herët, kjo parti fitoi edhe zgjedhjet e Parlamentit Europian. Zgjedhjet rajonale u mbajtën në situatën e gjendjes së jashtëzakonshme pas sulmeve të Parisit.
Përgatiti: Juli Prifti – /tesheshi.com/
