Bota ka mbajtur frymën teksa përtej oqeanit kanë nisur zgjedhjet presidenciale. Askush nuk di të thotë me siguri nga anon peshorja e fitores, por kanë nisur të dallohen gjithsesi tërheqjet e para në mënyrën e qasjes së deritanishme ndaj figurës së shumëdiskutueshme të Donald Trump-it.
Raportimet nga terreni flasin për radhë të gjata votuesish në disa vende, veçse procesi i votimit po vijon në tërësi pa probleme. Një proces votimi që pason 18 muaj fushatë të ethshme, të përshkuar nga përplasje të forta mes rivalëve për postin e presidentit.
Hillary Clinton, kandidatja demokrate, ka votuar mëngjesin e kësaj të marte, duke shpresuar të bëhet e para femër që zgjidhet presidente e SHBA-së.
Ajo votoi së bashku me të shoqin, ish-presidentin Bill Clinton, pranë shtëpisë së saj, në një shkollë në Chappaqua, në Nju Jork. “Jam shumë e lumtur. Jam pabesueshmërisht e lumtur. Të gjithë miqtë dhe fqinjët e mi; kjo më bën shumë të lumtur,” kanë qenë ca prej fjalëve të saj.
Për kandidatin republikan nuk ka qenë dhe aq e këndshme pritja në qendrën e votimit, në Manhattan, ndërsa ka patur zëra kundër tij.
Trump është shoqëruar nga e shoqja dhe nga e bija gjatë hedhjes së votës.
“Duket shumë mirë. Do të jetë një ditë interesante. Faleminderit,” mësohet të ketë thënë Donald Trump në qendrën e votimit. /tesheshi.com/
