E para gjë që ka konfirmuar raundi i parë i zgjedhjeve presidenciale në Francë është parashikimi se në balotazhin e pas dy javëve do të shkojnë Emmanuel Macron dhe Marine Le Pen.
Këto zgjedhje, ndër më të rëndësishmet mes vendeve të Bashkimit Europian, kanë dhe një të veçantë tjetër: për herë të parë në historinë moderne të Francës nuk do të jetë në balotazh asnjë kandidat i partive kryesore.
Pjesëmarrja do të ishte më e lartë në votimet e së dielës nga çfarë mendohej. Me 96 për qind të votave të numëruara, sipas raportimit të BBC-së, centristi Emmanuel Macron ka siguruar 23.9 për qind të tyre, e Marine Le Pen e ekstremit të djathtë është në nivelin e 21.4 përqindëve.
“Ne kemi ndryshuar në një vit fytyrën e jetës politike franceze,” u tha Macron mbështetësve të tij. Një ish-ministër ekonomie në qeverisjen e presidentit Francois Hollande, ai do të bëhet presidenti më i ri në moshë i Francës nëse fiton më 7 maj.
Në krahun tjetër, udhëheqësja e Frontit Nacional, fitores të së cilës i druhen fort në Europë, e quajti historik rezultatin e raundit të parë të zgjedhjeve presidenciale.
Vënia në krah të Emmanuel Macron-it ka ardhur menjëherë pas zgjedhjeve të djeshme. Francois Fillon, një prej kandidatëve që doli jashtë gare, u bëri thirrje qytetarëve francezë të votojnë në balotazh për Macron-in.
“Solemnisht bëj thirrje për një votë për Emmanuel Macron-in në raundin e dytë… për të mundur Frontin Nacional…,” do të shprehej kryeministri Bernard Cazeneuve pas daljes së rezultateve. /tesheshi.com/
