Marine Le Pen, kandidatja e ekstremit të djathtë, Emmanuel Macron, kandidati centrist, Francois Fillon, përfaqësuesi i konservatorëve, dhe Benoit Hamon e Jean-Luc Melenchon, kandidatë të së majtës, qenë pjesë e të parit debat televiziv mbi zgjedhjet presidenciale në Francë, që zgjati mbi tre orë e gjsymë në mbrëmjen e së hënës.
Arsimi, siguria, shekullarizmi, financimi i fushatës, vendi i Francës në Europë, ishin mes çështjeve të debatuara midis pesë kandidatëve, ku vendin kryesor në diskutim e zunë Marine Le Pen dhe Emmanuel Macron.
“Dua të jem presidente e republikës franceze, por vërtet. Nuk aspiroj të administroj atë çka është bërë një rajon i vagullt i Bashkimit Europian. Nuk dua të jem zëvendëskancelarja e Merkel-it,” deklaroi Marine Le Pen në hyrje të fjalës së saj.
Në të kundërt të saj, Emmanuel Macron foli për besim në vendin, në energjitë e tij, duke përdorur një ligjërim shumë më të butë. Por kur në debat zuri vend çështja e burkinit, Macron shpërtheu ndaj akuzës së Le Pen-it se ai e mbështeste atë.
Macron, që shihet si fituesi i zgjedhjeve në balotazhin e majit, iu kundërpërgjig kandidates së ekstremit të djathtë me akuzën se po e shfrytëzonte Islamin për të përçarë vendin.
Në lidhje me politikën e jashtme, Macron tha se dëshironte një mëvetësi të Francës brenda projektit europian, e jo jashtë tij.
Marine Le Pen mendohet se do të udhëheqë karshi Emanuel Macron-it në raundin e parë të zgjedhjeve, për të lëshuar terren e për të humbur në të dytin. Fitorja e saj në zgjedhjet presidenciale në Francë do të ishte lajmi më i keq për vendin e saj, si dhe për Europën.
Ndryshe nga debati i mbrëmshëm televiziv, në dy të tjerët, më 4 dhe më 20 prill, do të ftohen të 11 kandidatët në këto zgjedhje. /tesheshi.com/
