Me dy të tretat e votave të numëruara pas zgjedhjeve të së dielës në Bullgari për presidentin e ri të vendit, ato i kryeson kandidati i mbështetur nga socialistët e opozitës.
Rumen Radev ka deri tani 25.7 për qind të votave, përkundër 22 për qind të votave që ka grumbulluar Cecka Caçeva, kandidatja e mbështetur nga kryeministri Bojko Borisov, i qendrës së djathtë.
Rezultati i tanishëm është në përputhje me sondazhet paraprake të së dielës, e mund t’i çojë kandidatët në një raund tjetër shtatë ditë më pas, më 13 nëntor.
Kryeministri kishte deklaruar më herët se do të tërhiqej e do të kërkonte zgjedhje të parakohshme nëse Caçeva, kryetarja e parlamentit bullgar, nuk e mundte në raundin e parë rivalin e saj, por e ndryshoi premtimin e tij mbrëmjen e shkuar.
Caçeva, një anëtare e partisë në pushtet, GERD-it, nëse zgjidhej, do të bëhej presidentja e parë femër e Bullgarisë. Prej saj pritej një vazhdim i politikës proeuropiane.
Rumen Radev, një ish-pilot dhe një ish-komandant i forcave ajrore, konsiderohet më i prirur nga Rusia. Ai ka kërkuar heqjen e sanksioneve të BE-së mbi Rusinë, si dhe ka thënë së fundi se, “Ne kemi humbur shumë duke e deklaruar Rusinë pask a shumë armike.” /tesheshi.com/
