Kanë mbetur diç më shumë se një orë kur procesi zgjedhor në Lëvizjen Vetëvendosje do të përfundojë dhe kandidati i vetëm për kryetar, Albin Kurti do rikthehet zyrtarisht sërish në krye të kësaj partie.
Komisioni Zgjedhor i VV-së ka njoftuar se procesi i votimit po zhvillohet në mënyrë të rregullt.
“Njëkohësisht votimi po zhvillohet në mënyrë të rregullt edhe jashtë Kosove në Qendrat e Lëvizjes VETËVENDOSJE! në mërgatë. Deri tani nuk është paraqitur asnjë ankesë nga vendvotimet dhe anëtarët, dhe procesi po zhvillohet me një interes të veçantë të shprehur nga anëtarësia. Shfrytëzojmë rastin të ftojmë edhe një herë të gjithë anëtarët e Lëvizjes VETËVENDOSJE! të dalin sot në votim për ta ushtruar të drejtën e tyre demokratike për përcaktimin e drejtimit të Lëvizjes VETËVENDOSJE”, thuhet në një njoftim të VV-së.
Kurti, pasi ka votuar në qendrën e votimit në shkollën fillore “Naim Frashëri” në kryeqytet, i ka cilësuar zgjedhjet brenda partisë si demokratike, duke i ftuar të gjithë që të votojnë për të zgjedhur kryetarin e partisë.
Kurti ka ftuar edhe të larguarit e fundit nga organet e partisë që të votojnë dhe të kryejnë obligimin statutor.
Megjithatë kjo thirrje e tij ka hasur në vesh të shurdhër pasi asnjë nga të dorëhequrit nga pozitat nuk ka dalë për të votuar, duke treguar qartë se kjo parti përfundimisht do ndahet.
Ndërkohë deputeti i VV-së, Liburn Aliu pas votimit ka shkruar në Facebook se dalja në zgjedhjet për kryetar të kësaj lëvizje është më e madhja ndonjëherë.
“Nga vizitat që jam duke bërë gjithandej nëpër vendvotime dhe nga informatat që po më vijnë nga qendrat e LVV, nga shifrat e daljeve në votime deri më tani është tejkaluar cilido votim i brendshëm në lëvizje. Reformës së shumëkërkuar organizative po i hapet rruga”, ka thënë Aliu. /tesheshi.com/
