Nga 15 shtatori deri në 30 tetor, Partia Socialiste do të zhvillojë zgjedhjet e brendshme, sipas vendimit të miratuar nga Asambleja, në fund të muajit gusht. Ndërkohë, konstituimi i Këshillave Socialiste do të bëhet nga 1-15 nëntor.
Gjatë proçesit, do të bëhet analiza mbi rezultatin e zgjedhjeve të 25 qershorit në çdo degë të Partisë Socialiste, ndërsa kryetarët që kanë një tregues negativ krahasuar me 2013-ën nuk do të kandidojnë.
Sipas vendimeve të Asamblesë, ku përcaktohen edhe kriteret, kandidatët për kryetar duhet të kenë të paktën një vit anëtarë të PS-së.
Organizimi i zgjedhjeve të reja në parti, sipas PS, bëhet për të përmirësuar rezultatin dhe rritjen e bashkëpunimit me qytetarët.
Ndërkohë, riorganizimin dhe analizën duhet ta përfundojnë edhe strukturat në Greqi, Itali dhe shtete të tjera.
Një tjetër pikë e rëndësishme është edhe ngritja e strukturave të reja të PS në vendet ku ka emigrantë.
Rreth 1480 kryetarë të organizatave të Partisë Socialiste do të largohen nga drejtimi i tyre për shkak të rezultatit të dobët gjatë zgjedhjeve të 25 qershorit.
Referuar dokumenteve të publikuara, bashkitë ku PS ka një rënie në rezultat janë: Kuçovë; Skrapar; Dibër; Elbasan; Cerrik; Peqin; Prrenjas; Pustec; Këlcyrë; Devoll; Shkodër; Vau i Dejës; Kamëz; Kavajë; Rrogozhinë.
Kjo do të thotë se drejtuesit e degëve në këto bashki nuk do të rikandidojnë në garën që nis nga nesër. /tesheshi.com/
