Pas pengimit për shtatë orë rresht të votuesve shqiptarë të Medvegjës që jetojnë në Kosovë nga ana e autoriteteve serbe, ka reaguar Këshilli për Mbrojtjen e të Drejtave e të Lirive të Njeriut (KMDLNJ). Në reagimin e KMDLNJ-së thuhet se pas përfundimit të luftës në Kosovë, Serbia përmes serbëve lokalë pati organizuar të gjitha zgjedhjet lokale dhe të përgjithshme ndonëse nuk kishte të drejtë për shkak se organizimi i zgjedhjeve është çështje krejtësisht e brendshme e shteteve dhe në rastin konkret llogaritej si ndërhyrje në punët e brendshme të Kosovës.
Po ashtu, KMDLNJ ka bërë të ditur se institucionet e Kosovës përveç kundërshtimeve asnjëherë nuk ndërmorrën ndonjë veprim për t’i penguar ato. KMDLNJ shprehet për një bashkëpunim të ngushtë të ndërkombëtarëve me Serbinë dhe përkrahjen e fuqishme që iu bë strukturave paralele që zgjedhjet i organizonin të stolisura me ikonografi dhe simbole të Serbisë dhe që në fushata zgjedhore merrnin pjesë politikanët e niveleve më të larta të shtetit serb. Policia e Kosovës dhe Rojat e Urës i siguronin kutitë e votimeve.
Përkundër kësaj situate me zgjedhjet serbe në Kosovë, në zgjedhjet e 13 Qershorit në komunën e Medvegjës, autoritetet serbe, me qëllim të pengimit të votimit për votuesit shqiptarë nuk lejuan për më shumë se shtatë orë hyrjen e votuesve shqiptarë duke krijuar radhë të gjata.
Votuesit shqiptarë nga Medvegja e kanë nënshtetësinë e Serbisë që u garanton të drejtën e votimit pa u penguar sepse, përveç se është e drejtë kushtetuese, e drejta për të votuar është obligim qytetar dhe e drejtë elementare e njeriut, thuhet në reagimin e KMDLNJ-së.
“Pengimi i qëllimshëm i autoriteteve serbe duke vështirësuar (në disa raste edhe pamundësuar qasjen e lirë në kutitë e votimit) për votuesit shqiptarë nuk zgjoi reagim të ndërkombëtarëve në përgjithësi dhe OSBE-së në veçanti dhe në këtë mënyrë po vërtetohet se për shkak të oportunitetit politik, po dëmtohet procesi i votimit dhe po dizenjohet rezultati i votimit që nënkupton se po përligjet zbatimi i standardeve të dyfishta”, thotë KMDLNJ.
/tesheshi.com/
