Kryesia Qendrore e Lëvizjes Besa në krye me kryetarin e saj Bilall Kasami, kanë pritur një delegacion të lartë të SHBA-së dhe BE-së në përbërje të David Stephenson, shef i sektorit politik dhe ekonomik në Ambasadën e SHBA-ve, Tibor Varadi, këshilltar politik i Delegacionit të BE-së, Laura Burns dhe Adrian Ismaili këshilltarë për çështje politike në Ambasadën e SHBA-ve.
Në këtë takim, siç njoftojnë nga Lëvizja Besa, është diskutuar për situatën politike në Maqedoni, janë sqaruar qëndrimet e Besës rreth Marrëveshjes së Përzhinos dhe problemet për mbajtjen e zgjedhjeve korrekte dhe demokratike.
Me këtë rast kryetari i Lëvizjes BESA, Bilall Kasami, pasi e përshëndeti deklaratën e ambasadorëve Bejli dhe Orav për gatishmërinë e shtetit që të mbahen zgjedhjet, edhe një herë e përsëriti qëndrimin e Kryesisë Qendrore se për BESËN nuk është me rëndësi data e zgjedhjeve, por është i rëndësishëm implementimi i plotë i Marrëveshjes.
“Për BESËN mbetet i rëndësishëm dhe i pranueshëm vetëm qëndrimi i faktorit ndërkombëtar përkitazi me kushtet për zgjedhje të drejta, demokratike dhe të lira. BESA do të marrë pjesë vetëm në ato zgjedhje, të cilat do të jenë të garantuara nga SHBA-të dhe BE-ja se do të jenë të drejta dhe të lira, pa mundësi manipulimi me vullnetin e qytetarëve”, ka deklaruar Bilall Kasami.
Më tutje në njoftimin e Lëvizjes Besa thuhet se përfaqësuesit e SHBA dhe BE-së mbeten të përkushtuar që Maqedonia të ketë zgjedhje të drejta dhe të lira, sepse vetëm ashtu ky vend mund ta vazhdojë rrugën euro-atlantike. /tesheshi.com/
