Gjuha politike gjatë fushatës zgjedhore në Maqedoni, siç dihet është e pasuruar edhe me nuancat e besimit. Ndër deklarimet më pikante të deritanishme veçon ajo e numrit dy të BESËS, Zeqirija Ibrahimit; që është njëherësh dhe kryesues i listës zgjedhore në njësinë nr. 1 në Shkup. Ai, në një bashkëbisedim me votuesit në Saraj, lagje e madhe shqiptare në periferi të kryeqytetit maqedon, i është kushtuar fenomenit të shit-blerjes së votës. Dhe kush e bën këtë gjë ditën e zgjedhjeve, sipas Zekës do japë llogari para Zotit.
“Nuk e kam hallin se do na vjedhin votat dhe do i humbim zgjedhjet, ajo është pak e rëndësishme. Por e kam hallin se jo vetëm ai që blen votën, por edhe qytetari që e shet votën duhet ta ketë parasysh se do të japë llogari para Zotit dhe mund të shkojë në xhenhem”, tha para qindra të pranishmëve Zeqirija Ibrahimi.
Në Maqedoni kjo gjuhë nuk përbën çudi; pasi duke qenë se popullata, sidomos ajo shqiptare është e lidhur ngushtësisht me besimin dhe kriteret e tij, këto më pas zënë vend natyrshëm edhe në ligjërimin politik. Këtë më së miri e tregon fakti se edhe liderët e tjerë, sidozot Ali Ahmeti, edhe pse nuk njihen si “xhematlinj”, Zotin, xhenhemin dhe xhenetin e kanë në majë të gjuhës kur është fjala për të vjelë vota.
M.Krasniqi – /tesheshi.com/
