Fushata për zgjedhjet e 11 dhjetorit në Maqedoni po shënon dita-ditës shtimin e rasteve, si kur ka ndonjë incident e si kur evidentohet ndonjë shkelje ligjore. Më i freskët është ai që partia shqiptare në pushtet, BDI, ka hapur shtabin e saj zgjedhor në shkollën fillore “Jashar Bej Shkupi”, pra në një institucion edukativo-arsimor shtetëror.
Ndërkohë, kjo parti edhe Konventën Promovuese e ka caktuar më 20 nëntor, ndonëse sipas rregullores së Këshillit Shtetëror Zgjedhor fushata parazgjedhore zyrtarisht fillon më 21 nëntor.
Sipas profesorit universitar në lëminë juridike, Osman Kadriu, këtu ka dy dukuri që duhet të vlerësohen, edhe konform asaj se si do të kualifikohen, ashtu edhe duhet të trajtohen nga ana e organeve që janë përgjegjëse për procesin zgjedhor.
“Dukuria e parë është takimi që kanë partitë politike me qytetarët; dhe këto takime, siç është e njohur, kanë filluar shumë më parë edhe nga partitë politike në bllokun shqiptar edhe atë maqedonas. Në qoftëse në këto takime promovohen këto, atëherë vlerësoj se është shkelje e ligjit, dhe nuk ka të bëjë fare me ato që quhen takime të rastit me qytetarët. Kjo ka të bëjë pastër me atë që quhet fushatë parazgjedhore, që sipas rregullativës që e ka krijuar Këshilli Shtetëror Zgjedhor fillon prej nesër. E dyta ajo e cila është shumë brengosëse, institucionet shtetërore, po edhe nxënësit, e studentët, po përfshirë këtu edhe godinat e tyre nuk guxohet të shndërrohen në shtabe partiake sepse kjo është në kundërshtim edhe me kushtetutën edhe me ligjin. Andaj shpresoj që këto shkelje ligjore nuk do të hasen në veshin e shurdhër të institucioneve, dhe të dënohen”, deklaroi për portalin tesheshi.com eksperti juridik Osman Kadriu.
Ndryshe këto zgjedhje si nga partitë politike po edhe nga faktori ndërkombëtarë cilësohen si zgjedhje historike për Maqedoninë për dalje nga kriza politike të cilën e ka kapluar vite me rradhë.
Përgatiti Mensur Krasniqi – /tesheshi.com/
