Janë publikuar rezultatet përfundimtare të zgjedhjeve të 9 shkurtit në Kosovë, pas numërimit të 100 për qind të votave nga vendvotimet.
Kështu, sipas rezultateve, Vetëvendosje ka marrë 342.281 vota ose ndryshe 40.80 për qind, Partia Demokratike ka marrë 184.811 ose 22.03 për qind, Lidhja Demokratike ka marrë 147.888 ose 17.63 për qind dhe koalicioni AAK Nisma ka marrë 62588 ose ndryshe 7.46 për qind të votave.
Gjatë ditës së sotme, KQZ-ja bëri të ditur gjithashtu se ka numëruar 92.73 për qind edhe të votave për kandidatët për deputetë.
Vetëvendosje, si fituese, është zotuar se do ta formojë qeverinë e re, ndonëse nuk i ka 61 deputetë për miratim të kabinetit të ri qeveritar.
Partitë opozitare, PDK, LDK, dhe AAK, kanë hedhur poshtë mundësinë e krijimit të koalicionit me VV-në dhe kanë shprehur gatishmëri për formimin e një qeverie së bashku. /tesheshi.com/
