Nga Blendi Gashi
Pas votimit të mocionit opozitar për rrëzimin e qeverisë, zgjedhjet e parakohshme sipas ligjit pritet që më së largu të zhvillohen brenda 45 ditësh, e që i bie më 11 qershor ose më 18 të po atij muaji.
“Pas shpërndarjes së Kuvendit të Kosovës zgjedhjet e parakohshme caktohen nga Presidenti jo me vonë se dhjetë (10) ditë pas shpërndarjes. Zgjedhjet e parakohshme nuk mund të mbahen më herët se tridhjetë (30) ditë dhe me vonë se dyzetë e pesë (45) ditë pas shpërndarjes. Zgjedhjet e parakohshme rregullohen nga ligjet dhe rregullat e njëjta të KQZ-së sikurse edhe zgjedhjet tjera, përveç se KQZ-ja mund të ndryshojë afatet kohore sipas nevojës në pajtim me rrethanat”, thotë ligji për zgjedhjet.
Ndërsa i mbetet presidentit Hashim Thaçi tashmë të shpallë zgjedhjet, partitë politike pa dallim që kanë nisur fushatën prej kohësh, ashtu siç bën fushatë edhe në seancën e së mërkurës pas rrëzimit të qeverisë dhe shpërbërjes së koalicionit. Ato janë deklaruar për media mbi koalicionet e mundshme para dhe paszgjedhore, por nuk kanë treguar saktësisht se me kë preferojnë t’i lidhin ato.
Kryetari i grupit parlamentar të LDK-së, Ismet Beqiri, pas rrëzimit të qeverisë ka thënë se LDK-ja ende nuk ka pasur bisedime për koalicione të mundshme parazgjedhore.
“Sistemi është i tillë që një parti nuk mundet vetme me udhëheq”, ka theksuar ai.
Kurse deputeti i Vetëvendosje-s, Glauk Konjufca ka thënë se partia e tij po sheh të gjitha mundësitë.
“Po e shqyrtojmë mundësinë se cili do të ishte për neve bashkëpunëtori më i mirë për qeverisjen e ardhshme”, tha Konjufca.
Ndërsa Daut Haradinaj, në një konferencë për media të mbajtur menjëherë për rrëzimin e qeverisë, bëri të ditur se nuk do të lidh koalicion parazgjedhor me PDK-në e LDK-në.
“Nuk ka asnjë marrëveshje me partitë në pushtet. AAK, vi të kuqe me partitë në pushtet. AAK ka një marrëveshje me Nismën, por jo me partitë në pushtet”, u shpreh kreu Haradinaj.
Koalicionet e mundshme parazgjedhore
Ndonëse drejtues të partive nuk kanë dashur të flasin për koalicionet e mundshme, qofshin ato para apo paszgjedhore, vet deklarimet e zyrtarëve të caktuar të subjekteve kanë lënë të kuptohet se kush me kë do afrohet.
Siç dihet, koalicioni i parë parazgjedhor veç është ndërtuar, pra ai AAK-NISMA. Këto dy parti nuk e kanë fshehur asnjëherë se duan të afrojnë edhe AKR-në e Behgjet Pacollit.
Ndërsa nuk përjashtohet mundësia që edhe Vetëvendosje t’iu bashkohet partive të lartcekura. Është Rexhep Selimi i cili në një intervistë për tesheshi. com javë më parë ka thënë se do ishte mirë që opozita të garonte së bashku me një listë zgjedhore.
Dihet se edhe Shpend Ahmeti, njeri me ndikim në Vetëvendosje ka kohë që bën thirrje që opozita të garojë në një listë të vetme zgjedhore dhe pjesë të saj të bëhen edhe pjesëtarë të shoqërisë civile.
Ndërsa Alternativa e Ilir Dedës dhe Mimoza Kusari-Lilës mund t’i bashkohet VV-së në listë parazgjedhore apo edhe opozitës së përbashkët, veç nëse arrihet një dakordim mes partive.
Por nuk përjashtohet mundësia që kjo parti të lidhë koalicion parazgjedhor edhe me LDK-në duke parë marrëdhëniet e mira mes Dedës dhe deputetës së kësaj force, Vjosa Osmani.
PDK ndërkaq mund bëj koalicion parazgjedhor sërish me Partinë e Drejtësisë dhe Lëvizjen për Bashkim.
Ja koalicionet e mundshme paszgjedhore
Çdo herë koalicionet paszgjedhore janë ato që shkaktojnë shumë zhurmë dhe tërheqin vëmendjen e opinionit publik.
Deri më sot koalicioni më i mundshëm paszgjedhor, pra që do formonte qeverinë e re, raportohet se është ai mes PDK-së, AAK-së dhe NISMA-s.
Dhe kjo mund të ndodh fare lehtë duke ditë se Aleanca e Haradinajt ka dhjetë vite që operon në opozitë.
Vet deklarimi i sotëm i Haradinajt ku përmend vija të kuqe me PDK-në e LDK-në vetëm për koalicionet parazgjedhore, lë të nënkuptohet se nëse Ramushi nuk arrinë të gjëj gjuhë të përbashkët siç ai dëshiron me Vetëvendosje-n, atëherë do lidh marrëveshje bashkëqeverisje me partinë e Veselit.
Dhe pa fije dyshimi, AAK do jetë partia që përcaktuese, ku të gjitha subjektet tjera do kenë syrin tek ajo, sidomos pasi që tashmë konsiderohet i pamundshëm një koalicion tjetër PDK-LDK.
Andaj, nuk përjashtohet mundësia edhe një koalicioni paszgjedhor VV-AAK, NISMA, AKR e Alterantiva si dhe eventualisht partitë e minoriteteve, për të formuar qeverinë e re.
Kurse më pak i mundshëm është ndërtimi i qeverisë nga Vetëvendosje dhe LDK duke ditur se partia e Visar Ymerit ka thënë publikisht se është e gatshme për bashkëpunim por vetëm nëse në krye të LDK-së nuk është Isa Mustafa.
Kujtojmë se ditët në vazhdim do jenë përcaktuese se kush me kë do lidhin koalicione, sidomos ato paszgjedhore, pasi dihet se pa ndërtimin e tyre asnjë parti nuk mund të marrë mbi 50 për qind të votave të qytetarëve. /tesheshi.com/
