Kreu i Bashkësisë Islame të Kosovës, Naim Tërnava ka “bekuar” fillimin e fushatës zgjedhore, duke uruar fushatë të qetë dhe zgjedhje produktive, por edhe duke kërkuar kulturë dhe sjellje të lartë.
Me rastin e fillimit të fushatës ai ka siguruar se Bashkësia Islame do ta ruajë paanshmërinë politike.
Ky është mesazhi i tij i plotë:
“Të nderuar qytetarë të Republikës së Kosovës, kandidatë për deputetë,
Nesër, zyrtarisht hapet fushat zgjedhore për zgjedhjet parlamentare në Republikën e Kosovës.
Si Myfti i Republikës dhe si udhëheqës i njërit prej institucioneve tona më të mëdha fetare dhe jo vetëm, kërkoj nga të gjitha ju që gjatë fushatës të tregoni kulturë dhe sjellje të lartë.
Pavarësisht dallimeve politike, gjërat tjera na bashkojnë, dhe pas datës 6 tetor, prapë bashkë duhet t’i kryejmë punët. Ne, si institucion fetar, do të ruajmë paanshmërinë politike, sepse ju të gjithë na përkisni neve dhe ne iu përkasim juve të gjithëve.
Ndaj, ne emër të Kryesisë së BIK-ut dhe në emrin tim personal, ju dëshiroj fushatë të ndershme, të qetë dhe pa probleme”.
Kujtojmë se partitë politike përfaqësohen nga dy gra me shami që pretendojnë postin e deputetes në Kuvendin e Kosovës, njëra nga to ish-deputete, ndërsa tjetra e rankuar lartë në Partinë Demokratike të Kosovës. /tesheshi.com/
