Duke u afruar mbrëmja, kohë kur dhe pritet të mbyllen kutitë e votiit për zgjedhjet e pjesshme në Kolonjë për kreun e Bashkisë, dy kahjet politike ka nisur përballjen deklarative duke hedhur akuza mbi njëra-tjetrën.
Në fillim ishte Edi Paloka nga PD që tha se ka disa incidente gjatë procesit, e që sipas tij, janë një reagim i një force që po ndjen humbjen.
“Në zona si Kolonja, Erseka dhe Leskoviku, ku kriminaliteti është në nivelet më të ulta, të bëhet presion me polici, nuk e kuptoj. Është e njëjta skemë si në Dibër”, tha ekspondenti demokrat.
Nga ana tjetër, është reaguar nga shtabi i kandidatit të majtë duke kundërshtuar pretendimet e ardhura nga e djathta.
“Populli i Kolonjës është një popull që shquhet për mikpritjen, vlerat, traditën, kulturën; dhe jemi të bindur se nuk do të provokohet nga prezenca e këtyre mercenarëve të dhunshëm . Ne dënojmë çdo përpjekje për dëmtimin e procesit zgjedhor nga kushdo qoftë dhe i bëjmë thirrje Partisë Demokratike të heqë dorë nga deklaratat e papërgjegjshme përmes të cilave kërkon të krijojë alibinë për humbjen e radhës, ndërkohë që është shumë ë rëndësishme që votuesit të vazhdojnë t’i drejtohen qendrave të votimit për t’i dhënë Kolonjës drejtimin e duhur dhe në shërbim të Kolonjarëve.”, thuhet në reagimin e shtabit të kandidatit Ilia Stefo.
Incidenti i vetëm ndodhi në Barmash, ku siç u njoftua, persona të caktuar goditën djalin e kryetares së degës së PS-së në zonë. /tesheshi.com/
