Për herë të parë që pas lufte, komuna e Drenasit në Kosovë, bastion ky deri më tani i pakontestueshëm i Partisë Demokratike (PDK), shkon në balotazh pasi asnjë nga kandidatët nuk ka arritur të marrë mbi 50 për qind të votave.
Në raundin e dytë do të garojnë Ramiz Lladrovci nga PDK dhe Isa Xhemajlaj nga Nisma për Kosovën.
Valdete Dakta, kryetare e Komisionit Qendror të Zgjedhjeve (KQZ), në një konferencë të mbajtur pak para orës 23:00, ka thënë se sipas rezultateve preleminare, Lladrovci ka fituar gjithsej 9 mijë e 11 vota, apo 45.21 përqind, ndërsa, Xhemajlaj ka marrë 5 mijë e 255 vota apo 27. 31 përqind.
Ajo ka thënë se sipas ligjit, balotazhi do të duhej të mbahej 4 javë pas ditës së zgjedhjeve.
PDK s’e ka pritur balotazhin
Mosarritja që të fitoj në raundin e parë në bastionin e tyre e ka befasuar tej mase edhe PDK-në e Kadri Veselit.
Nënkryetari i kësaj partie, Memli Krasniqi ka thënë për televizonin publik se nuk kanë pritur që të shkojnë në balotazh, dhe ka shtuar se do të mobilizohen që në raundin e dytë, kandidati i tyre Ramiz Lladrovci të fitojë me patjetër.
I pavaruri Drenori: S’e mbështes Lladrovcin
Kandidati i pavarur, Xhavit Drenori i cili fitoi 12 % ka bërë të ditur se nuk e mbështet PDK-në në balotazh pasi Lladrovci s’është i denjë për kryetar.
“Në Drenas sot vendin e parë e ka arritë PDK, por jo Ramiz Lladrovci. Ai nuk është i denjë që ta drejtojë Drenasin. Nuk kam qenë i dhënë mbas posteve sa mbas ndryshimit në Drenas. Prandaj personalisht nuk shoh shpresë nga të dy kandidatët që shkojnë në balotazh, sidomos nga Lladrovci”, ka përfunduar Drenori.
Kurse partia e kryeministrit Isa Mustafa, LDK-ja, është shprehur se nuk janë rezultatet të kënaqshme dhe të pritshme për këtë parti. Sipas tyre, ata kanë pritur që të jenë së paku partia e dytë.
Balotazhi për kryetar të Drenasit do të mbahet më datë 1 janar të vitit 2017. /tesheshi.com/
