Ndërsa procesi zgjedhor për kryebashkiakun e ri të Dibrës ka njohur një pjesëmarrje prej 26 për qind deri në orën 13, partitë politike janë angazhuar në një “luftë” të vërtete denoncimesh me fotografi e video për të treguar përpjekjen e palës kundërshtare për të blerë votat e manipuluar zgjedhjet.
Kështu, shtabi elektoral i kandidatit të koalicionit të majtë denoncoi fenomenin e fotografimit të votës në qendrën e votimit nr.1130, në fshatin Pekë të njësisë administrative Melan, duke nxjerrë edhe foton përkatëse, por pa detaje sesi e ka siguruar atë.
Shtabi elektoral thotë se vota është fotografuar nga një votues i kandidatit të koalicionit të opozitës Sherefedin Shehu. PS denoncoi, gjithashtu, se në disa qendra votimi komisionerët e Partisë Demokratike kanë shkelur përcaktimet e kodit zgjedhor, duke ekzspozuar në ambientet e brendshme materiale propagandistike partiake dhe me siglën e kësaj force politike. 
Ndërkaq, partia Demokratike publikoi fotografitë e një fugoni që shpërndante thasë me miell, për të denoncuar shtabin kundërshtar se po blen vota. Sipas PD-së, banorët në fshatin Lishan i Epërm konstatuan një furgon që shpërndante miell në këmbim të votës. PD shton se banorët kryen arrestim qytetar për shoferin e furgonit. /tesheshi.com/
