Agjencia e lajmeve Reuters raporton për fitore të GERB-it, partisë së qendrës së djathtë, në zgjedhjet e parakohshme parlamentare në Bullgari.
Rezultati zyrtar përfundimtar pritet të dalë të enjten, por pas numërimit të rreth 90 për qind të votave, GERB-i, një parti me prirje europiane, udhëheq me 32.58 për qind.
Socialistët e BSP-së vijnë të dytët, me 26.8 për qind të votave, ndjekur nga Patriotët e Bashkuar, një aleancë nacionaliste, që ka mundur të fitojë 9.2 për qind të votave.
Ish-kryeministri Boiko Borisov shpalli fitoren për GERB-in, duke deklaruar se do të bënte përpjekjen maksimale për të formuar sa më shpejt një qeveri. Nëse gjithçka shkon siç duhet, Borisov-it do duhet t’i jepet mandati për të formuar kabinetin e tij të tretë.
Udhëheqësja e socialistëve, Kornelia Ninova, e ka pranuar humbjen, duke shtuar se nëse rivalët e qendrës së djathtë nuk arrijnë ta formojnë qeverinë, atëherë do të shihet mundësia për ta formuar atë BSP-ja.
Sipas ndjekësve të afërt të zzhvillimeve politike në Bullgari, krijimi i qeverisë do të jetë i vështirë, e koalicioni qeverisës mund të jetë jetëshkurtër. /tesheshi.com/
