Deri në 50 mijë euro do jetë gjoba për abuzime gjatë fushatës elektorale apo ditën e votimeve, për zgjedhjet e pritshme lokale në Kosovë, të cilat do të mbahen më 22 tetor.
Për këtë, Komisioni Zgjedhor për Ankesa dhe Parashtresa (PZAP), ka hartuar një udhëzues se si qytetarët mund të ankohen në rast së shohin ndonjë shkelje të kandidatëve apo partive gjatë zgjedhjeve lokale dhe cilat janë dënimet e mundshme për këto shkelje.
Më pas vijon paralajmërimi i ndëshkimeve:
“Personi që mban pozitë publike, personi i zgjedhur apo i caktuar, nuk mund të përdorë atë zyrë ose ndonjë nga pasuritë e asaj zyre me qëllim të përfitimit të votave. Asnjë nga burimet e institucioneve të administratës publike, qoftë të nivelit qendror ose lokal, ose edhe ndonjë ndërmarrjeje në zotërim ose të kontrolluar nga autoritetet qendrore ose lokale, nuk mund të shfrytëzohen ose të futen në mbështetje të ndonjë subjekti politik në zgjedhje”, thuhet në veprimin e ndaluar për shërbyesin publik e që është e dënuar me maksimumin deri në 50 mijë euro.
Përdorimi ose kërcënimi me përdorim të dhunës së çfarëdo lloji nga subjekti politik, anëtarët, mbështetësit ose kandidatët e tyre, ndalohet rreptësisht sipas udhëzuesit të PZAP-it.
Për subjektet politike që përfaqësohen në Kuvend gjoba është nga 5 deri maksimumi në 20 mijë euro.
Ndërsa për subjektet politike që nuk përfaqësohen në Kuvend është deri në 10 mijë euro.
Partitë politike apo kandidatët për kryetar komune duhet të kujdesen që të mos përdorin dhunë ndaj subjekteve apo kandidatëve tjerë, pasi kjo nga PZAP është e dënuar me maksimum 50 mijë euro.
Veprimet e ndaluara nuk gjobiten vetëm me mijëra euro.
PZAP ka paraparë edhe dënime me burg në rast se kundërligjshëm pengon një person nga kandidimi për zgjedhje, shkruan Indeksonline.
Ky akt dënohet me burgim deri në 1 vit.
Ndërsa, nëse kanoset kandidati apo përdoret forcë ndaj tij, kryesi dënohet me burgim prej gjashtë muaj deri në tri vjet.
Po ashtu, nëse dikush në mënyrë të kundërligjshme pengon personin nga e drejta për të votuar, nuk e regjistron në listën e votuesve apo e heq nga ajo listë, dënohet me burgim prej 1 vit deri në 3 vjet.
E për falsifikimin e rezultateve të votimit, në rast së kryer nga një anëtar i KQZ-së apo dikush nga pozita e tij që ka gjatë zgjedhjeve, dënimi është i paraparë nga 3 vjet deri në 5 vjet. /tesheshi.com/
