Me afro 40 përqind të votave, Demokracia e Re në Greqi është rikthyer triumfalisht në pushtet, duke i dhënë fund epokës së Syriza-s, e cila qeverisi vendin në një nga periudhat më delikate për ta nxjerrë atë nga kriza e thellë financiare. Kështu, të majtët jo-tradicionale me në krye të Tciprasin kalojnë në opozitë dhe e djathta tradicionale ringjitet në pushtet me Kyriakos Mitsotakis.
“Unë do të jem kryeministër i të gjithë Greqisë dhe do të punojë shumë fort që të bind edhe qytetarët që nuk na votuan. Jam plotësisht vetëdijshëm për përgjegjësinë kombëtare, qëndroj modest ndaj vendimit të populli, por edhe marr forcë për të nesërmen”, tha Mitsotakis pas konfirmimit të fitores.
Ndërsa Tciprasi u tregua po ashtu korrekt në lojën demokratike.
“Respektoj vendimin e popullit. Kontaktova Mitsotakis dhe e përgëzova për fitoren e tij. Në demokraci ndryshimi i qeverisjes është thelbësore. Nuk do të bëjë atë që kanë bërë kundërshtarët e mi, por do të respektoj vullnetin e popullit”, u shpreh Tsipras.
Këto zgjedhje, të cilat ishin të parakohshme, u thirrën vetë nga kryeminstri Tcipras, pas humbjes së shumicës në zgjedhjet për Parlamentin Europian. /tesheshi.com/
