Ashtu siç ishte parashikuar, në Maqedoni ka nisur proçesi i votimit normalisht që në orën 07.00 të mëngjesit. Autoritetet vendase njoftojnë se deri tani zgjedhjet po kryhen pa probleme dhe qendrat e votimit janë hapur për të pritur rreth 1 milion e 770 mijë banorët maqedonas.
Sasho Pecalevski, kryetari i KSHZ-së në Resnjë, informoi se votimi po kryhet pa pengesa.
“Të gjitha vendvotimet me kohë janë hapur pa probleme. Proçesi zgjedhor për momentin po realizohet normalisht”, deklaroi Pecalevski.
Po ashtu, zgjedhjet e parakohshme parlamentare, sot do t’i vëzhgojnë rreth 8 mijë persona të paracaktuar, ku 667 janë të huaj dhe 75 gazetarë nga mediat ndërkombëtare. Sipas Komisionit Shtetëror të Zgjedhjeve janë të akredituar edhe 354 përkthyes.
Shoqata qytetare “MOST” do t’i ndjek zgjedhjet e parakohshme parlamentare me mbi 3000 vëzhgue, ndërsa 80 tjerë do të ndjekin punën e komisioneve komunale të zgjedhjeve dhe Komisionit Shtetëror të Zgjedhjeve.
Fushata zgjedhore, e cila zgjati 20 ditë, filloi më 21 nëntor dhe përfundoi më 9 dhjetor në mesnatë. Në zgjedhje marrin pjesë 11 subjekte politike: gjashtë parti dhe pesë koalicione me 58 lista me 1.092 kandidatë./tesheshi.com/
