Lëvizja Besa nuk do të marrë pjesë në zgjedhjet e parakohshme parlamentare më 5 qershor. Këshilli Qendror i kësaj partie ka konstatuar se është vënë në pikëpyetje e ardhmja euro-atlantike e vendit; është devalvuar Marrëveshja e Përzhinës; vendimi i presidentit Ivanov për abolimin e politikanëve ka krijuar pasoja serioze politike dhe ka tensionuar vendin.
Gjithashtu, sipas Lëvizjes Besa nuk ka as kushte minimale për zgjedhje të lira dhe demokratike, që ka detyruar këtë parti të mos marrë pjesë në zgjedhjet e caktuara nga pushteti VMRO-BDI.
“Këshilli Qendror konkludoi se në Maqedoni nuk ka as kushte minimale për zgjedhje të lira, korrekte, demokratike e të drejta dhe për këto arsye mori vendim që Lëvizja BESA, në këso kushtesh, të mos marrë pjesë në zgjedhjet e paracaktuara njëanshëm për 5 qershor nga partitë qeveritare VMRO-BDI”, thuhet në komunikatën e kësaj lëvizjeje.
Sipas Lëvizjes BESA, tejkalimi i krizës aktuale politike bëhet vetëm me ridefinimin e vendit në shtet të përbashkët konsensual të shqiptarëve dhe maqedonasve. /tesheshi.com/
