Nga Blendi Gashi
LDK-ja e inatosur me rrëzimin e kreut të saj, Isa Mustafa, nga pushteti ka nisur të luajë lojën e partive opozitare duke mos e njohur Hashim Thaçin president.
Këtë e ka bërë të ditur vetw kjo parti përmes një kumtese dërguar mediave, duke thënë se marrëveshja “bie në tërësi dhe LDK-ja nuk njeh asnjë pikë të saj dhe asnjë rezultat politik të saj”.
Dhe, pra sot LDK ka bojkotuar takimin konsultativ të presidentit Thaçi me anëtarë të partive politike për caktimin e datës se zgjedhjeve të parakohshme, derisa opozitarët VV, AAK e NISMA janë “dorëzuar” dhe janë ulur në tavolinë me presidentin, ku kanë përmendur 11, 18 dhe 25 qershorin, si data alternative, por që vendimi final do merret pas konsultimit me Komisionin Qendror të Zgjedhjeve.
“Jo zgjedhje në kohën e Ramazanit”
Por, Isa Mustafa ditë më parë u shpreh haptaz kundër që zgjedhjet të mbahen në muajin qershor, andaj mbetet të shihet në orët në vazhdim se cili do jetë reagimi i LDK-së, karshi datave të propozuara nga partitë tjera.
“Ne nuk pajtohemi që të shkohet në zgjedhje në muajin qershor, nuk pajtohemi gjithashtu që zgjedhjet të mbahen në kohën e Ramazanit. Ne kemi një komunitet të madh mysliman i cili agjëron dhe të cilin ne s’mund ta thërrasim që të dalë në fushatë, ose ejani në kohën e agjërimit edhe votoni. S’kemi nevojë të ngutemi”, tha ai, më 9 maj për RTK-në, sa mbante postin e kryeministrit.
Ky deklarim i bërë pak para se të rrëzohet nga posti i kryeministrit me qëllim që të përfitojw politikisht nuk i ka ndezur, andaj mbetet të shihet në ditët në vijim nëse Mustafa do dorëzohet dhe do pranojw qershorin si muaj të zgjedhjeve.
As Bajram Gecaj, nga LDK nuk ka mundur të thotë nëse kjo parti do pranojw nëse në qershor do mbahen zgjedhjet. Gecaj ka deklaruar për mediat se për momentin nuk mund të flasë për këtë çështje, por se vendimin do ta marrë partia.
Andaj, shtrohet pyetja, a mos vallë ka për synim të ndjek rrugën e Bashës në Shqipëri, jo të ngrejw ndonjë çadër pranë qeverisë, por të bojkotojw zgjedhjet me pretekstin se ato nuk do jenë të lira?
Ja ç’thonë analistët politikë
Analistët politikw, shprehen se Mustafa nuk guxon të ndjekë rrugën e Bashës dhe në fund do dorëzohet dhe do i futet garës zgjedhore në qershor.
Analisti politik, Mentor Tahiri, pohon se skema elektorale në Shqipëri dhe Kosovë dallojnë njëra me tjetrën.
Sipas tij, mbajtja e zgjedhjeve në Shqipëri pa njërin krah ideologjik, e bën krejtësisht të pakuptimtë dhe do të jepte sensin e monizmit politik, pasi partitë atje janë qartë të profilizuara, derisa në Kosovë nuk çon peshë nëse një subjekt bojkoton zgjedhjet.
“Një bojkot i mundshëm nga cilado parti, nuk mundet asesi të krijojë efektin e njëjtë sikur bojkoti i PD-së në Shqipëri. Caktimi i datës së zgjedhjeve është diçka konsensuale brenda afateve të përcaktuara me ligj, kurse këtu një zë i vetmuar i LDK-së brenda debatit për datën nuk çon shumë peshë. Në anën tjetër, bojkotimi që LDK ka paralajmëruar së do t’i bëjë presidentit, është gjithashtu joefektiv nëse nuk mbështetet sw paku edhe nga një forcë tjetër politike, në këtë rast aludoj në Vetëvendosje, e cila ka pas në të kaluarën deklarime të ngjashme”, thotë Tahiri, për tesheshi. com.
Faik Krasniqi, njohës i rrethanave politike, mendon se bojkoti që sot LDK i bëri presidentit është një lojë dhe asgjë më shumë.
“Data e zgjedhjeve përcakohet nga vullneti i shumicës së partive. Ka dallim mes opozitës në Shqipëri dhe LDK-së. Janë rrethana krejt ndryshe. Isa Mustafa nuk ka arsye që t’i bojkotojë zgjedhjet, sepse rrëzimi i qeverisë u bë në mënyrë legjitime. LDK-ja dhe Isa Mustafa e kanë ditur që nga fillimi që një gjë e tillë herët ose vonë do të ndodh. Konsideroj që është një lojë e Isa Mustafës për t’iu hakmarrë PDK-së se gjoja nuk e njeh presidentin Thaçi, president i cili u zgjodh me votat e LDK-së, por në fund prapë se prapë do të dorëzohet dhe do ti futet garës për zgjedhje. Alternativë tjetër nuk ka”, thotë Krasniqi.
Portali ynë ka tentuar të marrë një përgjigje nga zyrtarë të LDK-së se a do pranojnë që zgjedhjet të mbahen në qershor, apo ka gjasa t’i bojkotojnë ato, por ata nuk janë përgjigjur thirrjeve telefonike. /tesheshi.com/
