Partia Popullore e kryeministrit në detyrë, Mariano Rajoy, arriti t’i fitojë sërish zgjedhjet e përgjithshme në Spanjë, por pa mundur të sigurojë një shumicë që do t’i mundësonte një qeverisje pa koalicion.
“Ne i kemi fituar zgjedhjet,” u tha Rajoy mbështetësve të shumtë të mbledhur jashtë selisë qendrore të konservatorëve spanjollë. “Ne kërkojmë të drejtën tonë për të qeverisur.”
Por Partia Popullore fitoi vetëm 137 vende për në parlamentin e ardhshëm, shumë më pak nga 176 vendet që garantojnë një shumicë të aftë për të qeverisur e vetme.
Socialistët u renditën të dytët në këto zgjedhje. Unidos Podemos mori aq vota sa të renditej e treta, e Ciudadanos e së djathtës së qendrës u përcaktua si partia e katërt.
Unidos Podemos pati rezultatin më të keq, duke humbur më shumë se një milion vota, për t’i çuar dëm pritshmëritë se do të bëhej partia kryesore spanjolle e së majtës.
Rajoy dhe partia e tij janë tani përballë së njëjtës sfidë me atë të dhjetorit, kur do të duhet të krijojnë një qeveri edhe pse nuk e kanë shumicën e duhur.
Ngërçi politik i këtyre muajve duket i vështirë të kapërcehet, por situata e përgjithshme në vend dhe në nivelin ndërkombëtar, e përkeqësuar pas Brexit-it, do t’i vërë politikanët spanjollë para detyrimit për të gjetur medoemos një zgjidhje e për të formuar një koalicion qeverisës. /tesheshi.com/
