Partia Socialiste teston LSI-në se çdo të bëjë me koalicionin në Dibër për zgjedhjet e 11 shtatorit. Burime brenda mazhorancës bëjnë të ditur se emir i Dionis Imerajt që ka dalë si kandidat për kryetar nuk është vendimi final i socialistëve të Dibrës, por siç mësohet, do të jetë kirurgu Muharrem Rama kandidati final që do të shkojë në KQZ.
Por ende nuk ka ardhur ndonjë sinjal mes dy partive aleate se çdo të bëjnë. Afati final i regjistrimit të koalicioneve në KQZ është dita e hënë.
LSI u regjistrua si forcë politike të premten në mëngjes.
Deputetët e Dibrës, Përparim Spahiu nga ana e LSI-së dhe Ulsi Manja nga ana e PS-së nuk kanë asnjë komunikim mes tyre.
Spahiu në një komunikim telefonik bëri një deklaratë lakonike, duke mos folur për fitore të koalicionit por “kandidatit më të mirë”.
“Unë jam deputet i Dibrës dhe ajo që më intereson më shumë janë projektet zhvillimore të saj. E rëndësishme është që Dibra të përfaqësohet në nivelet më të mira dhe besoj se dibranët do të dinë të bëjnë zgjedhjen e duhur”.
Formalisht, Spahiu është përjashtuar nga LSI pas deklaratës kundër SHBA për Reformën në Drejtësi; por realisht ai është kreu i strukturave të partisë së Metës në Dibër.
Ndërkaq, në orët në vazhdim pritet të ketë një takim mes Ilir Metës dhe Edi Ramës për të vendosur nëse do të ketë koalicion zgjedhor në Dibër ose jo.
Nëse palët nuk bien dakord, atëherë rënia e qeverisë së përbashkët është shumë afër.
Vendi do të përgatitet për një situatë të re dhe votimet e 11 shtatorit do të jenë testi politik ku PS dhe PDIU do të garojnë kundër PD-së dhe LSI-së me një kandidaturë më të fortë.
Siç mësohet, në Peshkopi ka pasur kontakte të shtuara mes njerëzve të PD-së dhe LSI-së dhe sipas të gjitha gjasave do të ketë një bashkëveprim.
A do të ketë aleancë politike PD-LSI?
Duhet pritur dita e hënë, por ngadalësimi i dialogut me PS-në parashikon një zhvillim ndryshe 1 prillit 2013. /tesheshi.com/
