Përveç zgjedhjeve italiane, një palë votimesh të tjera kanë qenë të rëndësishme rrotull nesh.
Në Serbi janë zhvilluar zgjedhjet për kreun e bashkisë së Beogradit, ku ka fituar fuqishëm partia e Presidentit Aleksandër Vuçiç.
Në Serbi, kreun e bashkisë e zgjedh jo elektorati direkt, por Këshilli Bashkiak. SNS-ja e Vuçiçit ka fituar 64 mandate nga 110 që ka gjithsej bashkia e Beogradit.
Tre parti të tjera kanë kaluar kufirin prej 3% për të marrë pjesë në Asamble.
Lista e udhëhequr nga Dragan Gjilasi, apo opozita e ish-presidentit Boris Tadiç, ka marrë 18.7%- 26 vende, lista e Aleksandër Sapiçit (ish-yll i vaterpolit dhe aleat me Çedomir Jovanoviçin) ka marrë 8.7%- 11 vende dhe Partia Socialiste e Daçiçit ka marrë 6.3%-9 vende në Asamble.
Në zgjedhjet e Beogradit nuk figuron fare partia e Vojislav Sheshelit që ka marrë 0.2% dhe nga ana tjetër Partia Liberal Demokrate e Çedomir Jovanoviçit ka marë gjithashtu më pak se kufiri.
B92 thekson në një analizë të sajën për zgjedhjet në kryeqytetin serb se gjithashtu është zhdukur nga qarkullimi një forcë politike e financuar nga Moska, e cila ka hyrë në Parlamentin Kombëtar dhe ishte një nga suprizat e zgjedhjeve të përgjithshme.
Dy janë dilemat që shtron televizioni kritik me qeverinë: ose realisht vota e Beogradit ka shkuar me koshiencë te Vuçiç i cili ka përkrahje nga Merkel dhe Brukseli dhe janë zhdukur ekstremet, ose vetë grupet ekstremiste kanë ndihmuar që partia e Presidentit të fitojë e vetme mazhorancën.
Beogradi është një qytet ku zhvillohen testet politike në nivelin nacional, ndaj qarqet europiane e cilësojnë shumë të rëndësishëm ballafaqimin e djeshëm elektoral.
Duket se Vuçiç ka marrë ndër vete të gjithë pjesët jo-militante të të gjitha grupimeve: opozitës proeuropiane dhe ekstremistët e Sheshelit me të famshem politikë e “dy karrigeve” siç i është thënë nga SHBA-ja.
Por presidentit serb, muajin e ardhshëm i duhet të zgjedhë ku të rrijë. /tesheshi.com/
