Nga Blendi Gashi
Ashtu sicc u paralajmërua ditë më parë, në Prishtinë AAK e Ramush Haradinajt mbajti një tubim, siç u quajt mospajtues dhe mobilizues, ku prezantoi platformën qeverisëse “për një Kosovë ndryshe”.
Dhe Haradinaj, si kryetar partie para simpatizantëve të mbledhur fajësoi qeverinë për dështim në të gjitha fushat, por pa përmendur emra konkretë, duke paralajmëruar më tej se 2017-ta do të jetë vit i zgjedhjeve të parakohshme dhe i ndryshimit në të mirë të qytetarëve.
“Na prift e mbara”, u tha ai, përkrahësve të tij.
Haradinaj, foli edhe për nivelin e lartë të korrupsionit, për çka shtoi se Europa nuk na hap dyert pa e luftuar këtë kancer të shoqërisë.
“Janë dhjetëra zyrtarë që janë të përfshirë në korrupsion ,por nuk e marrin dënimin dhe ka të tjerë që nuk i kap ligji. Rendi dhe ligji në Kosovës duhet të vendoset. Plani ynë për rend dhe ligj e garanton këtë”, tha ai.
Po ashtu ai tha se me planin e AAK-së, Kosova do të hapet për investitorë dhe premtoi edhe shërbime shëndetësore të mira e arsim cilësor.
Dhe opozitari që kundërshtoi fuqishëm Demarkacionin me Malin e Zi u shpreh se përkrahja për ndryshimin e madh ekziston dhe sipas tij kjo do të dëshmohet në zgjedhje.
Ja kush zuri vendet e lëna bosh nga Shala e Kadaj-Bujupi
Në këtë tubim prezentë ishin të gjitha figurat e larta të partisë. Për dallim nga takimet tjera, shumica prej tyre këtë herë me vete kishin marrë dhe gratë e tyre. Ndoshta janë inspiruar nga kreu i PDK-së Kadri Veseli i cili nuk shkon në asnjë tubim të madh elektoral pa gruan e tij.
Përveç kësaj, ky tubim tregoi edhe diç tjetër. Të paktën nëse i referohemi rezervimit të ulëseve për zyrtarët e partisë. Pra, u kuptua se edhe cilat janë figurat kryesore të cilat Haradinaj llogarit që t’i ketë pranë vetës nëse merr pushtetin.
Për dallim nga e kaluara ku krah të djathtë kishte Blerim Shalën (i larguar, tashmë deputet i pavarur), dhe shtylla të partisë, Donika Kadaj-Bujupin (e larguar drejt Vetëvendosje-s), dhe Burim Ramadanin (i tërhequr nga struktrat e brendshme), tani tre njerëzit që më së shumti llogarit Haradinaj janë nënkryetari i parë Ardian Gjini (ish-deputet); gazetari shumë vjeçar, tashmë zëdhënës, Muharrem Nitaj; si dhe Pal Lekaj (deputet, njëherit kryetar i grupit parlamentar).
Por, befasia padyshim se është Nitaj. Edhe pse i është bashkuar vonë partisë ai ka arritur të fitojë besimin e plotë të liderit të tij, pasi është njeriu i parë që e shoqëron çdo kund.
Rezervimi i vendit në ulësen e parë në të majtë të Haradinajt tregon se ky i fundit e llogarit shumë ish-gazetarin dhe sikur dëshiron të tregojë njëkohësisht se përfundimisht ka gjetur zëvendësuesin e Shalës (po ashtu një ish-gazetar).
Ulëse në rendin e parë ju rezervuan edhe zyrtarëve të tjerë të lartë, si: Ahmeti Isufit (nënkryetar), Gazmend Abrashit (nënkryetar), Blerim Kuçit (sekretar i përgjithshëm), Lahi Brahimja (deputet, njëherit daja i Ramushit), Ali Berisha (sekretar organizativ) Avni Arifi (kryetar i degës Prishtinë), Daut Haradinaj (deputet, njëherit vëllai i Ramushit) etj. /tesheshi.com/
