LDK, partia e ish-prsidentit Rugova, do ketë një grua kandidate për kryeministre, në ofertën e saj para elektoratit për zgjedhjet e parakohshme të 6 tetorit.
Ka qenë vetë kreu i LDK-së Isa Mustafa ai që shpalli kandidaturën e Osmanit, pasuar nga ajo e Lutfi Hazirit, nr.2 të partisë, njëherësh kreu i Gjilanit.
“Vendimi është arritur në pajtim të plotë, nuk kemi bo ndarje kush ka merita më shumë në parti. Lutfi Haziri do të ketë rol kyç në rolin e fushatës pasi unë nuk do të mund të jem në terren dhe ja kanë dhënë të gjitha kompetencat që t’i ushtroj zoti Haziri qe të realizoj fushatën dhe ti fitojmë zgjedhjet. Këta të gjithë do t’a përkrahin plotësisht kandidaten Osmani për të treguar programin qeverisës të LDK-së. Nesër do ta mbajmë takimin e Këshillit të Përgjithshëm dhe do ta marrim miratimin përfundimtar”, deklaroi Isa Mustafa.
Nga ana tjetër, znj.Osmani, e njohur si kritike e Mustafës në parti, e quajti këtë të fundit një mentor të denjë politik.
“Dua të falenderoj kryetarin Mustafa për ndihmën që na ka dhënë neve që si shumë të tjerë e nisim rrugëtimin tonë në politik. Bashkë me të gjithë ata që më votuan në mënyrë unanime do ta kthejmë Kosovën në rrugën e drejtë. I garantoj qytetarët që asnjëherë më nuk do të ndihen se nuk kanë zë e në veçanti gratë. Jam e bindur që vetëm si ekip duke i qëndruar përkrah njeri tjetrit do ta çojmë përpara vendin tonë dhe të jemi të ndërgjegjshëm që vendit tonë t’ia kthejmë dinjitetin që qytetarët të ndihen krenarë me liderët e vet”, tha Vjosa Osmani.
Para Vjosa Osmanit, kandidaturën për kryeministër e kanë shpallur dhe Kadri Veseli nga PDK dhe Fatmir Limaj nga NISMA. /tesheshi.com/
