“Vota është pushteti juaj sovran, vota është dinjiteti juaj”,- kanë qenë fjalët e Presidentit Bujar Nishani, i cili u ka bërë thirrje të gjithë qytetarëve të marrin pjesë në zgjedhjet vendore të datës 21 qershor.
Ai i cilësoi proceset zgjedhore në Shqipëri që nga viti 1992 e këndej si promotorë të zhvillimeve demokratike në vend.
“Vota e lirë i jep jetë gjykimit publik të pushtetit, i jep jetë llogaridhënies së drejtuesve të zgjedhur para qytetarëve. Indiferenca, mospjesëmarrja, e ca më keq shitblerja e votës, investojnë papërgjegjshmërinë e pushtetit”,- tha Nishani.
Sipas Presidentit, testi zgjedhor i datës 21 qershor, thuajse një vit nga marrja e Statusit të Vendit Kandidat, duhet të shërbejë si investimi ynë kryesor për çeljen e negociatave për anëtarësim në Bashkimin Evropian.
“Me bindjen dhe besimin tim të palëkundur, dëshiroj të përsëris thirrjen time drejtuar gjithë shqiptarëve: Ushtroni të drejtën e tuaj të votës në mënyrë të pavarur dhe të lirë ditën e diel, më datë 21 qershor 2015, mos e tjetërsoni votën tuaj, mos e shisni votën tuaj!”,- tha ndër të tjera z. Nishani. /tesheshi.com/
