Vendet e BE-së po bëhen gati për zgjedhjet e radhës për Parlamentin Europian. Këto zgjedhje kanë një rëndësi gati historike, pasi për herë të parë që nga themelimi, Unioni “kërcënohet” nga rrymat eurospektike dhe populiste, që tashmë duan të kenë dhe vende në PE.
Zgjedhje me një “defekt demokratik” të pranuar
Edhe pse janë zgjedhje të drejtpërdrejta ku qytetarët e BE votojnë fshehurazi, megjithatë, parimi i demokracisë që të gjitha votat përfaqësohen në mënyrë të barabartë, këtu nuk është i zbatueshëm. Përshembull, secili prej 96 deputetëve gjermanë ekzistues përfaqëson rreth 860,000 gjermanë. Secili prej gjashtë deputetëve nga Malta përfaqëson vetëm 80,000 maltezë. Por votat e deputetëve janë po aq të rëndësishëm kur bëhet fjalë për marrjen e vendimeve në parlament, pavarësisht nga numri i njerëzve që ata përfaqësojnë. Kjo Rregullore është e përfshirë në Traktatet e BE-së.
Votimi i detyrueshëm
Në pesë vende evropiane, votuesit janë të detyruar të marrin pjesë në zgjedhjet e Parlamentit Europian – Belgjikë, Bullgari, Qipro, Greqi dhe Luksemburg. Kjo vlen edhe për qytetarët e shteteve të tjera anëtare të BE-së që jetojnë dhe kanë të drejtën e votës në ato vende.
Shumë parti
Që nga zgjedhjet e para të PE në 1979, numri i partive politike aktive kombëtare është rritur nga 57 në 212 aktualë. Arsyeja për këtë është rritja e numrit të anëtarëve të BE-së nga 9 në 28. Megjithatë, numri i grupeve politike në PE ka mbetur kryesisht stabil. Pas zgjedhjeve të fundit, ai u ngrit nga shtatë në tetë.
Të ardhurat
Përfaqësuesit e PE marrin një pagë neto 8,757 euro në muaj. Përveç kësaj, ata marrin një shumë prej 4.513 euro për mbulimin e kostove të përgjithshme, si dhe një pagesë prej 320 euro për pjesëmarrje në takime.
Përfaqësimi i grave
Numri i grave në PE po rritet me çdo zgjedhje të re. 40 vjet më parë femrat përbënin vetëm 16.3 përqind, ndërsa tani ata janë 36.9 përqind. Malta ka numrin më të lartë të përfaqësueseve në PE (67 përqind), e ndjekur nga Irlanda dhe Suedia (55 përqind).
Stafi
Në janar 2018, ishin 7.698 njerëz që punonin për PE dhe grupet politike. Më shumë se gjysma janë gra (55 përqind). Shumica e punonjësve ndodhen në godinat e Parlamentit Europian në Bruksel (4,903) dhe Luksemburg (2,251). Në selinë kryesore, në të Strasburgut, janë të punësuar vetëm 292 persona.
Pjesëmarrja
Në zgjedhjet për PE në vitin 2014, votuan 42.6% e qytetarëve të BE-së. Burrat u përgjigjën 45 për qind dhe gratë 40.7 për qind. Në Kroaci, vetëm 25.2 përqind e votuesve iu përgjigjën zgjedhjeve të vitit 2014.
Pjesa e popullsisë
Gjermania ka popullsinë më të madhe në mesin e shteteve anëtare të BE-së: 16.1 përqind e popullsisë së përgjithshme evropiane jeton në atë vend. Pas Gjermanisë, pason Franca (13.1 përqind), Britania e Madhe (12.9) dhe Italia (11.8 përqind). Nga ana tjetër, Luksemburgu dhe Malta, përbëjnë 0.1 përqind të popullsisë së BE-së. Kroatët kontribuojnë vetëm me 0.8 përqind popullsi në BE.
Besimi
Qytetarët me pak besim në BE nuk janë hungarezët apo polakë, siç mund të imagjinonin shumë, por qytetarët e kombeve që kanë themeluar BE-në, Francë dhe Itali. Në këto vende në sondazhin e Eurobarometrit të vitit 2018, vetëm një në tre vetë tha se ata e “besojnë në BE”. Situata është e ngjashme në Republikën Çeke dhe në Mbretërinë e Bashkuar, e cila po përgatitet të largohet nga BE. Qytetarët e Greqisë, vendi që ndikohet fuqishëm nga kriza ekonomike dhe migracioni evropian, kanë besimin më të vogël. Vetëm një në katër vetë beson në BE. Lituanezët, danezët dhe suedezët janë ata që kanë më shumë besim në Union.
Problemet
Emigracioni perceptohet si problemi më i madh për Bashkimin Europian në pothuajse të gjithë anëtarët e tij, sipas sondazhit Eurobarometër. Ka vetëm dy përjashtime: Suedia, ku ndryshimi i klimës është problemi më i madh, ndërsa në Portugali problemi më i madh është terrorizmi. Megjithatë, qytetarët e të dy vendeve e konsiderojnë imigracionin si një nga problemet më të rëndësishme në Bashkimin Evropian. /tesheshi.com/
