Me 58 vota pro, e asnjë kundër, Agim Ademi është zgjedhur kryetar i Federatës së Futbollit së Kosovës në Kuvendin e jashtëzakonshëm, për të vazhduar mandatin deri në vitin 2020, që mbeti vakant pas vdekjes së papritur të legjendës së futbollit Fadil Vokrri.
Ademi ka premtuar se do të japë maksimumin për ta çuar përpara futbollin kosovar.
“Sigurisht se nuk e kam të lehtë ta zëvendësoj Fadil Vokrrin, por me përkrahjen tuaj do ia dalim. Unë jam njëri nga ju, jemë shumë njerëz që e duam futbollin. Pjesa ime më e fortë do të jetë puna jonë e përbashkët, dhe shpresojmë se do ia dalim t’i përfundojmë projektet që po vazhdojnë e ato që do të vijnë. Do të jem para jush në çdo kohë kur ju keni nevojë”, ka thënë ai.
Servet Yardimci, në emër të UEFA-s, kujtoi punën e Fadil Vokrrit për Federatën e Futbollit të Kosovës.
“Kemi qenë pothuajse si vëllezër me zotëri Fadil Vokrrin. Ai gjithmonë ka kryer detyrat e tij si kryetar i FFK-së. Fadil Vokrri ka gëzuar respektin dhe miqësinë e të gjithëve. Prej arritjeve më të mëdha është anëtarësimi i Kosovës në FIFA dhe UEFA”, tha ai.
