Lista Serbe arriti të fitojë zgjedhjet e pjesshme lokale në katër komunat veriore të Kosovës: Mitrovicë të Veriut, Zveçan, Leposaviq dhe Zubin Potok, komuna këto të banuara me shumicë serbe.
Në mesnatë, Goran Rakiq shpalli fitoren e “Srpska”-s duke e quajtur “fitore të popullit serb dhe shtetit të Serbisë”.
“Ajo që dua të them në fillim është se bojkoti i opozitës dhe disa kuazi-satelitëve këtu në terren nuk ka pasur sukses. Lista Serbe ka fituar mbi 90 për qind të votave në katër komunat veriore”, tha Rakiq, cituar nga DW.
Ja të dhënat zyrtare:
Mitrovicë e Veriut
Lista Srpska – Goran Rakiq me (95.2%)
PDK – Gonxhe Çaushi (3.1%)
Vetëvendosje – Erden Atiq (1.6%)
Zubin Potok
Lista Srpska – Srxhan Vulloviq me (94.1%)
PDK – Hysen Mehmeti (3.1%)
Vetëvendosje – Liridona Kahrimani (2.8%)
Leposaviq
Lista Srpska – Zoran Todiq (96.4%)
PDK – Shaqir Hetemi (2.1%)
Vetëvendosje – Fisnik Veseli (1.5%)
Zveçan
Lista Srpska – Vuçina Jankoviç (96.4%)
Vetëvendosje – Avdi Peci (2.2%)
PDK – Ilir Peci (1.4%)
Beogradi zyrtar e mirëpriti fitoren e “Srpska”-s, për të cilën presideti Vuçiç, tha se ky është konfirmimi më i mirë për unitetin politik të serbëve rreth interesave vitale dhe nacionale.
“Me këtë fitore nuk do t’i zgjidhim të gjitha problemet tona, por kemi treguar se duam unitet në zgjidhjen e këtyre problemeve dhe zgjidhjen e përbashkët të tyre. Mendoj se pas të gjitha kërcënimeve nga shqiptarët dhe disa serbë, ky është konfirmimi më i mirë për unitetin politik të luftës për interesat tona vitale dhe nacionale dhe interesat tona më të rëndësishme shtetërore”, tha Vuçiç. /tesheshi.com/
