Zoran Milanoviç është Presidenti i ri i Kroacisë, pasi arriti të mposhtë, ngushtësisht në raundin e dytë, të shumënjohurën Kolinda Grabar-Kitaroviç,
Milanoviç arriti të sigurojë 52,70% të votave, kundrejt 47.30% të Kitaroviç.
“Le të qëndrojmë të bashkuar për Kroacinë tonë. Kroacia ka vendosur: Zoran Milanoviç fitoi dhe unë e përgëzoj për këtë”, tha Kolinda, gruaja që u bë e famshme me protagonizimin e saj prej adoleshenteje gjatë Kupës së Botës në 2018-ën, ku Kroacia arriti deri në finale.
“Mesazhi që duhet të nxjerrim është se jemi më të fortë kur jemi bashkë. Ne e treguam atë në luftë, ne e tregojmë atë në paqe”, tha Grabar-Kitaroviç.
Përurimi i Zoran Milanoviç si President i Republikës së Kroacisë do të mbahet në shkurt.
Social Demokrati Zoran Milanoviç është presidenti i pestë i Republikës së Kroacisë që zgjidhet në zgjedhjet demokratike shumëpartiake që nga 1990.
Që nga ky vit e deri në 99-ën, Presidenti i Kroacisë ishte Franjo Tudjman, deri sa ndërroi jetë.
Zoran Milanoviç lindi në 30 tetor 1966 në Zagreb.
Ai mbaroi shkollën e mesme në Qendrën për Administrim dhe Drejtësi, dhe më pas në Fakultetin Juridik në Zagreb.
Ai ka qenë punonjës i Ministrisë së Punëve të Jashtme kroate që nga 1993.
Një vit më vonë, ai mori pjesë në misionin paqeruajtës të OSBE-së në Azerbajxhan.
Në vitin 1996, ai u bë këshilltar i Misionit Kroat në Bashkimin Evropian dhe NATO-s në Bruksel, ku në vitin 1998 mbaroi studimet pasuniversitare në të drejtën evropiane dhe krahasuese dhe mori një diplomë master.
Ai ka qenë president i SDP që nga viti 2007, pas vdekjes së Ivica Raçan.
Ai mbeti njeriu i parë i Social Demokratëve Kroatë në vitin 2016.
Më pas hapi një firmë këshilluese, EuroAlba përmes së cilës, këshilloi dhe kryeministrin shqiptar Edi Rama.
Kulmin e karrierës së tij politike e pati si kryeministër i Kroacisë, nga 23 dhjetori 2011 deri më 22 janar 2016. /teshesh.com/
