I mbledhur në sesionin e parë të vitit të ri legjislativ, parlamenti turk ka zgjatur me shumicë votash mandatin për të dërguar trupa jashtë vendit.
Mandati mundëson dërgimin e trupave në Siri e Irak, dhe është zgjatur me një vit, për të përfunduar më 30 tetor të vitit të ardhshëm. Përmes tij bëhen të mundura aksionet ushtarake në kufirin në jug të vendit kundër organizatave terroriste.
Ai u kalua me votat e tre partive kryesore parlamentare, ndërkohë që përjashtim bënë përfaqësuesit e kurdëve, të cilët votuan kundër.
Mandati është miratuar fillimisht në parlamentin turk në tetor të 2014-s, e në shtator të një viti më pas është përtërirë për një periudhë tjetër njëvjeçare.
Ishte pikërisht ky mandat që lejoi më 24 gusht nisjen e operacionit “Mburoja e Eufratit” në tokën siriane.
Parashikohet nëpërmjet tij dhe përdorimi i bazave ajrore turke dhe i territorit turk nga forcat e huaja kundër kërcënimeve të njëjta, përfshirë ISIS-in, PKK-në dhe degët e saj siriane. /tesheshi.com/
