Joe Biden ka mbërritur sot në Bagdad, në kërkim të zgjidhjes së një krize të rëndë politike që ka mbërthyer vendin e trazuar.
Edhe pse për shkaqe sigurie nuk është bërë e njohur axhenda e zëvendëspresidentit amerikan, ai pritet të takohet me udhëheqësit irakianë, si dhe me zyrtarë të qeverisë, për të theksuar nevojën për unitet mes palëve.
Qeveria irakiane është thuajse e paralizuar nga protestat dhe nga kërkesat për reforma politike, ndërsa i duhet të përballet me një ekonomi në pikë të hallit. Kriza e qeverisë ka penguar dhe luftën ndaj ISIS-it.
Trazira politike është nxitur nga manifestimet e mbështetësve të klerikut shiit Mukteda es-Sadr, që kërkojnë t’i jepet fund korrupsionit dhe keqadministrimit. Eshtë kërkuar që politikanët të zëvendësohen me teknokratë, e që figurave të rëndësishme të milicisë shiite t’u jepen poste ministrore me peshë.
Kryeministri irakian, Hajdar el-Abadi, vetë një shiit, ka shprehur paaftësi udhëheqëse me dështimin e tij për t’u hapur rrugën reformave të premtuara prej kohësh dhe për t’i administruar përplasjet sektare.
Parlamenti miratoi dy ditë më parë emrat e disa ministrave të rinj, në një përpjekje të kryeministrit për të ulur vrullin e protestave.
Obama do ta quante kryeministrin irakian një javë më parë si një “partner të mirë”, duke kërkuar në të njëjtën kohë që qeveria e tij t’i bashkonte fraksionet rivale për të mëkëmbur ekonominë dhe për të luftuar terrorizmin. /tesheshi.com/
