Akti terrorist i orëve të para të janarit në një klub nate të Stambollit, prej së cilit mbetën të vdekur e të plagosur dhjetëra persona, është ende në qendër të vëmendjes.
Zëvendëskryeministri turk, Numan Kurtulmush, ka dhënë këtë mëngjes një intervistë për televizionin informativ A Haber, ku ka folur dhe për këtë temë.
Sipas agjencisë së lajmeve Reuters, Kurtulmush ka deklaruar se sulmi në klubin e natës është kryer në mënyrë profesionale me përfshirjen e një organizate të shërbimit të fshehtë.
“Duket se sulmi në Reina nuk është thjesht akt i një organizate terroriste, por ka gjithashtu të përfshirë një organizatë të shërbimit të fshehtë. Ishte një akt tejet i organizuar dhe i planifikuar,” raporton Reuters të ketë thënë zëvendëskryeministri i qeverisë turke.
Për të njëjtën çështje, e përditshmja turke Sabah vë këto fjalë në gojën e të njëjtit zyrtar qeveritar, “Sulmi në Reina është një punë mjaft profesionale. Duket hapur se është një sulm shumë i planifikuar. Mbi këtë sulm do të hidhet dritë me përfundimin e hetimeve. Kanë për të dalë lidhjet kyçe pas tij.”
Përgjegjësinë për sulmin e ka marrë ISIS-i, që e argumenton si shpagim për ofensivën turke në territorin sirian. Megjithatë, personi përgjegjës për sulmin mbetet ende në arrati. /tesheshi.com/
