Zëvendëskryeministri turk: amerikanët të mbajnë fjalën, Turqia nuk planifikon të qëndrojë në Siri

Numan Kurtulmush, zëvendëskryeministri turk, u ka thënë sot gazetarëve në një konferencë shtypi se Turqia nuk planifikon të qëndrojë në Siri, e se të gjithë aktorët në rajon janë njoftuar për operacionin “Mburoja e Eufratit,” përfshirë dhe regjimin e Damaskut, të lajmëruar përmes Rusisë.

“Turqia nuk është një vend pushtues, e nuk po hyn në luftë,” ka deklaruar ai, duke kujtuar se Forcat e Armatosura Turke nuk do të qëndrojnë mënjanë nëse do të ketë ndonjë kërcënim.

Ai e ka shpjeguar përsëri qëllimin e operacionit të ushtrisë turke, që është largimi i militantëve të ISIS-it nga rajoni, si dhe pengimi i kurdëve të PYD-së e YPG-së që ta marrin plotësisht nën kontroll korridorin.

Ndërsa SHBA-të e kanë quajtur sot të papranueshme përplasjen mes forcave turke dhe disa grupeve në veri të Sirisë, duke bërë thirrje që palët në luftime të tërhiqen dhe të përqendrohen në luftën kundër ISIS-it, Kurtulmush ka thënë se Turqia do të mbrohet nga sulmet e ardhshme, se nuk mund të qëndrojë duarkryq e të vështrojë sulmin që mund të vijë nga Siria.

“Nëse i tërë rajoni bie nën kontrollin e një grupi të vetëm, PYD-së, atëherë Siria do të ndahet. Ne jemi në favor të [ruajtjes së] integritetit territorial të Sirisë.”

Kurtulmush është shprehur për gazetarët se SHBA-të duhet të mbajnë fjalën, e ta detyrojnë PYD-në kurde të tërhiqet në lindje të Eufratit.

“SHBA-të janë në dijeni të ndjeshmërisë së Turqisë mbi këtë çështje. Një premtim qe dhënë: PYD-ja nuk do të qëndrojë në perëndim të Eufratit.”

Ai e ka bërë të qartë se forcat e YPG-së, krahut të armatosur të PYD-së, do të vihen në shenjë gjersa të lëvizin në lindje të Eufratit. /tesheshi.com/