Blendi Gashi
Me profesion është specialiste e Ortopedisë së nofullave. Por, nga ky vit ka vendosur që të bëj një ndryshim të madh në karrierën e saj. Të merret aktivisht me politikë. I është bashkuar AKR-së së Behgjet Pacollit, ku është zgjedhur zëvendës i tij në parti.
Është kjo Albena Reshitaj, një emër i ri në skenën politike. Ajo thotë se u inkuadrua në politikë për të dhënë, për të shtyrë përpara proceset që kanë stagnuar në vend që nga paslufta, e jo për të përfituar.
Reshitaj, në një intervistë dhënë për tesheshi. com shprehet e bindur se partia e saj do jetë përcaktuese në formimin e qeverisë së re, derisa tregon nëse kanë apo jo vija të kuqe me partitë qoftë për koalicione para apo paszgjedhore.
Znj. Reshitaj, së pari a mund të na thoni, pse vendosët të merreni me politikë? Pse pikërisht ju bashkuat AKR-së dhe jo ndonjë partie tjetër?
Duke marrë parasysh tash e 18 vite pas luftës, Kosova po ballafaqohet ende me probleme ekzistenciale dhe politika ka qenë ajo që ka stagnuar proceset integruese dhe funksionalizimin e shetësisë, angazhimi im në politikë ka për synim shtyrjen e këtyre proceseve përpara. Programi i AKR-së është më i avancuar, me vizionin më të çarte e më origjinal. Zbatimi i tij nga ekspertë të përgatitur të profileve të ndryshme lë shumë për të shpresuar për ndryshim cilësor në vendin tonë.
Ju jeni zgjedhur zv.presidente e kësaj partie, pozitë të cilën e ka pasur Mimoza Kusari-Lila. Konkretisht cila është detyra juaj? Ç’kontribut pritni të jepni në skenën politike kosovare?
Nuk kisha dashur që personaliteti im të identifikohet me asnjë personalitet tjetër të skenës politike. Detyra ime thelbësore është që të punojë me profesionalizëm dhe të jap maksimalisht nga përvoja ime dhe avancimi që kam arritur me forcat e mija deri këtu. Unë kam hyrë në politikë për të dhënë, s’kam nevojë të pres për të marrë apo përfituar. Ne, më shumë se kurrë më parë kemi nevojë ta lëmë të kaluarën në vendin e saj, të punojmë drejt dhe maskimalisht ta ndryshojmë të tashmën dhe të krijojmë kushte dhe mundësi për një të ardhme me përspektivë.
Tema më aktuale është ajo e koalicioneve parazgjedhore. A mund të na thoni se me cilat parti jeni në bisedime dhe me cilën prej tyre ka gjasa më shumë të lidhni koalicion?
Si njëra ndër partitv e vetme liberale në vend, AKR është e hapur për bisedime, për mundësi bashkëpunimi me të gjithë ata që synim kanë zhvillimin e Kosovës. Pra, jemi edhe për mundësi koalicioni. Nuk vëjmë apo krijojmë vija të kuqe apo të verdha ndaj asnjë subjekti politik. AKR-ja ka vizionin e qartë dhe unik, dhe në kërkim të mundësisë së implementimit të programit tonë, do mbetemi figura e njëjtë pa marrë parasysh mundësitë e koalicioneve para apo paszgjedhore.
Cili është kushti kryesor që i keni vënë si parti qoftë LDK-së, VV-së, apo AAK-së e NISMA-s, për tu bashkuar me to?
Kusht kryesor është verifikimi i detajuar i programeve dhe përafrimi i tyre me programin tonë.
Po, nëse garoni të vetëm në zgjedhje, a besoni se do kaloni pragun zgjedhor? Dhe, a do jetë në këtë rast z. Pacolli, kandidat për kryeministër?
Nuk diskutohet çështja e pragut zgjedhor, AKR e kaon atë. Po vendosëm të garojmë të vetëm, zotëri Behgjet Pacolli do të jetë kandidat për kryeministër padyshim.
Pavarësisht koalicioneve të mundshme parazgjedhore, më shumë e shihni AKR-në në qeveri apo në opozitë pas zgjedhjeve?
Ne si AKR disa herë ua kemi diktuar fitoren partive më të mëdha. Kjo po ndodh edhe kësaj here. Kjo na bën të jemi para një përgjegjësie shumë të madhe kombëtare. AKR definon fituesin!
Ju si një grua me pozitë vendimarrëse a pritni si në qeverinë e re ashtu edhe në legjislaturën e radhës të Kuvendit të ketë më shumë femra?
Pres nga këto zgjedhje që të reflektohet në gjenerim të një numri më të madh të femrave në pozita vendimmarrëse. Këto pritje janë reale dhe shpresoj që femra në Kosovë të marrë një pozitë më të favorshme.
Për fund, a do ketë AKR kandidat për Prishtinën në zgjedhjet lokale që mbahen në vjeshtë të këtij viti? Po, në komunat tjera?
AKR me strukturat e saj janë mirë të organizuara dhe mobilizuara edhe pë zgjedhjet lokale. Krejt në fund i uroj vendit tim fat dhe shumë suksese në zgjedhjet e 11 Qershorit. Kosova e meriton ta duam më shumë, të punojmë për të dhe të ardhmen e saj. /tesheshi.com/
