Gent Cakaj, deri dje ministër i Jashtëm në detyrë, tha se nuk do ta lërë Shqipërinë, të cilën e cilësoi si një ëndërr të kahershme të tijën personale.
Në një dalje para medias për t’ja dorëzuar detyrën Olta Xhaçkës, me prezencë dhe të kryeministrit Rama, Cakaj tha se do jetë krah pasardhëses së tij në krye të diplomacisë.
“Angazhimi im në Shqipëri nuk mbaron këtu unë do të vazhdoj angazhimin në Shqipëri unë jam rritur me Shqipërinë, më shumë se një realitet politik ka qenë një ëndërr historike.
Do ta mbaj në çfarë do cilësie që do të më gjejë e nesërmja. Nga dita e sotme nuk jam një paraardhës politik i juaji por mbështetësi i juaj, që ju të shkëlqeni si një ‘zonjë e hekurt’ në krye të diplomacisë shqiptare”, tha Cakaj.
Për Ramën, Cakaj u godit në mënyrë absurde ndërkohë që është një kapacitet.
“Dua ta falënderoj Gentin për gjithçka që bëri në këto dy vjet në këtë detyrë aspak të lehtë dhe përtej faktit që u godit në mënyrë sa absurde aq dhe të shëmtuar dhe për të qenë i paragjykuar ua doli ta mbajë me sukses barrë dhe të tregojë hap pas hapi të gjithsa cilësitë e tij krejt të veçantë që do të ketë kohën dhe mundësinë t’i shpalosë në të ardhmen në funksion të kësaj lidhje të pazgjidhshme me Shqipërinë dhe për pasionin e tij të politikës që unë e njoh mirë. Pasion i mbështetur jo në atë zjarrin e brendshëm të talentit polik por edhe në kulturë dhe dije mbresëlënëse”, tha Rama. /tesheshi.com/
