Branimir Stojanviç, zëvendësi i kryeministrit Isa Mustafa, e ka cilësuar si negative përjashtimin e UMNIK nga proceset për Kosovën, ndërsa është shprehur se është mirë që EULEX gjendet në Kosovë për të kontrolluar institucionet vendore.
“Marrëveshja për procesin e transferimit të kompetencave të misioneve ndërkombëtare në Kosovë tek institucionet kosovare është arritur ndërmjet politikanëve shqiptarë dhe përfaqësuesve të BE-së. Frikohemi se ky proces do të vazhdojë, edhe pse EUELX-i në formatin e tashëm, në planin e mbrojtjes së interesave të serbëve, as për së afërmi s’i përplotëson interesa e tyre”, ka thënë Stojanoviç për gazetën e Beogradit “Veçernje Novosti”.
Ai ka shtuar se me marrëveshje është paraparë transferimi gradual i kompetencave tek institucionet vendore.
“Ky parim është lansuar në momentin që u vendos që EULEX të vendoset në Kosovë, përkatësisht kur u vendos që UNMIK të përjashtohet pothuaj nga të gjitha proceset në Kosovë. Në fakt, transferimi i kompetencave ka filluar me ardhjen e EULEX-it dhe tani ky është vetëm vazhdimi”, ka thënë Stojanoviç.
Ai, megjithatë ka tërhequr vërejtjen se prania e EULEX-it në Kosovë është shumë e rëndësishme, sepse, ka thënë ai, pa këtë mision dhe rolin e tij, nuk do të kishte as minimum të kontrollit të institucioneve që duhet të sigurojnë sundimin e ligjit, e sundimi i ligjit, sipas serbëve në Kosovë, nuk po funksionon. /tesheshi.com/
