Ambasadorja gjermane në Tiranë, Susanne Schütz, gruaja që po dublon boshllëkun e lënë nga dyshja Lu – Vllahutin sa i përket reformës në drejtësi e të tjera çështjeve që kanë të bëjnë me të, edhe njëherë ka rrëzuar versionin e opozitës mbi vettingun në politikë.
Sipas saj, siç e thotë dhe mazhoranca, vettingu që kërkon opozita mundësohet nga SPAK dhe BKH, dy instanca të reformës në drejtësi në pritje për t’u formuar.
Ajo dha një intervistë për DW në shqip, ku sqaroi pozicioin e saj, në emër të Berlinit zyrtar, mbi prerendimet e opozitës.
“Së pari kush do ta bëjë vettingun politik të familjarëve? Nuk jam e sigurtë se cili do të jetë një institucion objektiv për ta bërë atë. Ka rreziqe, duhet të shikohet me shumë kujdes dhe duhet të jetë një proces në linjë me rregullimet ligjore”, tha Susanne Schütz.
Ajo theksoi rëndësinë e krijimit të Këshillit të Lartë të Gjyqësorit dhe Këshillit të Lartë të Prokurorisë, prej së cilës shkohet natyrshëm te vettingu që kërkon opozita
“Shpresoj që ato të zgjidhen sa më parë. Janë struktura shumë të rëndësishme të sistemit të ri të gjyqësorit. Kur të zgjidhet Këshilli i Lartë i Prokurorisë do të bëhet e mundur edhe zgjedhja e prokurorëve të SPAK – Prokuroria e Posaҫme kundër Korrupsionit dhe Krimit të organizuar- që besoj se do të jetë një institucion shumë i rëndësishëm për të kryer mes të tjerave edhe vettingun e politikanëve”, tha përfaqsuesja e Berlinit në Tiranë.
Por Susanne Schütz dyshon në arsyen se përse opozita po i mëshon debatit për vetting në politikë.
“Debati lidhur me vettingun e politikanëve kam frikë se është një konsumim kohe dhe energjie, që mund ta largojë vëmendjen nga vettingu i gjyqësorit, që është vërtet thelbi i reformës në gjyqësor. Pa një vetting të suksesshëm të gjyqësorit nuk mund të ketë një sistem gjyqësor të reformuar për të hetuar politikanët”, tha ambsadorja gjermane. /tesheshi.com/
