Bashkimi Evropian po shkon drejt një “lufte të ftohtë ekonomike” me Kinën ndërsa liderët e tij përgatiten për një votim vendimtar nëse do të vendosin tarifa për importet e makinave elektrike të prodhimit kinez, paralajmëroi kryeministri hungarez Viktor Orban, vendi i të cilit mban presidencën e rradhës të BE-së.
Shtetet anëtare të BE-së do të votojnë sot nëse do të vendosin tarifa deri në 45% për automjetet elektrike të importuara të prodhimit kinez për pesë vitet e ardhshme në çështjen tregtare më të profilit të bllokut, duke rritur rrezikun e hakmarrjes nga Pekini.
Pas abstenimit nga një votim i parë jo-detyrues mbi propozimin në korrik, Gjermania, partneri kryesor tregtar i Hungarisë dhe ekonomia më e madhe e BE-së, do të votojë kundër vendosjes së tarifave nga BE, thanë për Reuters burime me njohuri për këtë çështje.
“Ajo që ata po na bëjnë të bëjmë tani, ose ajo që BE dëshiron të bëjë, është një luftë e ftohtë ekonomike,” i tha Orban radios shtetërore hungareze në një intervistë, duke iu referuar tarifave të propozuara të BE-së ndaj Kinës.
Orban, i cili ka udhëhequr një shtytje në Evropën Qendrore për të sjellë fabrikat kineze të makinave elektrike dhe baterive në Hungari, tha se Hungaria, një vend pa dalje në det, nuk donte të shtrydhej në asnjërin bllok dhe donte të vazhdonte tregtinë me të dyja palët.
Ai gjithashtu vuri në dukje se produktet e prodhuara në BE do të jenë shumë të vështira për t’u shitur nëse ekonomia botërore ndahet në dy blloqe dhe shtoi se është e paqartë nëse Hungaria mund të ndjekë me sukses strategjinë e saj të “neutralitetit ekonomik”. /tesheshi.com/
